Eron prezidenti lavozimini tark etayotgan Hasan Ruhoniy o‘zi hukmronlik qilgan yillardagi hukumatning xato harakatlari uchun xalqdan kechirim so‘radi. Bu haqda u Vazirlar Mahkamasining o‘zi boshchiligidagi so‘nggi yig‘ilishida aytib o‘tdi, deb yozadi Anadolu Agency.
“Bugun Eronning 12-hukumatining oxirgi yig‘ilishi bo‘lib o‘tdi. Shuningdek, bu mening Islom Respublikasi prezidenti sifatida so‘nggi bayonotim. O‘tgan yillarda biz o‘z bayonotlarimizda odamlarni aldamadik. Haqiqatni gapirdik. Biroq ayrim haqiqatlarni yashirishga majbur bo‘lgan paytlarim ham bo‘ldi, chunki men ularni befoyda deb hisoblardim yoki ular milliy birlikni buzishi mumkinligidan qo‘rqardim”, — dedi Ruhoniy.
Ruhoniyning ta’kidlashicha, prezidentligining birinchi muddatida (2013—2017-yillar) Eron jahon hamjamiyati bilan hamkorlik qilgan va istiqbolli iqtisodiy sharoitlarga ega bo‘lgan. Biroq 2018-yilda AQSh yadroviy bitimdan chiqib, Eronga qarshi sanksiyalarni qayta tiklaganidan keyin vaziyat o‘zgardi. Sanksiyalar mamlakatni iqtisodiy urush markaziga olib kirdi.
Eron prezidentining so‘zlariga ko‘ra, uning hukumatining urinishlariga qaramay, mamlakatdagi ayrim kuchlar sanksiyalarni olib tashlashga to‘sqinlik qilgan.
“Agar milliy birlik kuchliroq bo‘lganida va barcha davlat organlari hukumatni qo‘llab-quvvatlab, biz bilan hamkorlik qilganida, mamlakatdagi vaziyat bundan bir necha barobar yaxshi bo‘lardi”, — dedi u.
Ruhoniy yo‘l qo‘yilgan xatolar uchun xalqdan kechirim so‘radi, amalga oshirilgan ishlar uchun hukumat a’zolariga minnatdorchilik bildirdi.
“Biz siyosatimizda kamroq xato va kamchiliklarga yo‘l qo‘yishga harakat qildik. Ammo agar qandaydir xatolar bo‘lsa, men buning uchun xalqdan kechirim so‘rayman”, — dedi u.
Ruhoniyning so‘zlariga ko‘ra, “aholi turmush darajasidagi vaziyatdan norozi va bunga haqli”. “Ammo biz iqtisodiy urush holatida bo‘lganimizni tushunib, shu nuqtayi nazardan nima qilishimiz mumkinligini ko‘rib chiqish kerak”, —deya qo‘shimcha qildi u AQShning sobiq prezidenti Donald Tramp davrida qo‘yilgan sanksiyalarni nazarda tutib.
Eronda prezident saylovlari iyun oyida bo‘lib o‘tdi. Mamlakatning yangi saylangan prezidenti Ibrohim Raisiy 3-avgustda o‘z lavozimiga kirishadi, uning inauguratsiya marosimi 5-avgustda bo‘lib o‘tadi.
Iyul oxirida Eronda ichimlik suvi yetishmasligi tufayli norozilik namoyishlari bo‘lib o‘tgandi. Xuziston viloyatidagi norozilik namoyishlari tufayli amaldagi prezident Hasan Ruhoniy davrining so‘nggi haftalari og‘ir kechdi. Saylangan prezident Ibrohim Raisiy inauguratsiyasini kutmasdan mamlakatda tartibni tiklashga kirishdi.
Qayd etish kerakki, Eronning yangi prezidenti — AQSh sanksiyalariga uchragan dindor konservator. U 1988-yilda rejimning minglab dushmanlarini qatl qilganlikda ayblanib kelmoqda.
Izoh (0)