Turkiyada terrorchilik tashkiloti deb tan olingan “Olov bolalari” guruhi o‘rmon yong‘inlari uchun javobgarlikni o‘z zimmasiga oldi. Bu haqda Yeni Safak gazetasi go‘yoki tashkilotga aloqador ijtimoiy tarmoqlarga tayanib xabar bermoqda.
“‘Olov bolalari’ Turkiya hududlaridagi sabotaj uchun javobgarlikni o‘z bo‘yniga oladi”, — deyiladi tashkilot bayonotida.
Shuningdek, gazeta keltirib o‘tgan xabarda aytilishicha, “turk rejimi boshqa hech qanday tilni tushunmasligi sababli” tashkilot tarafdorlari o‘rmonlarga o‘t qo‘ygan.
Nashr ma’lumotlariga ko‘ra, “Olov bolalari” Anqara tomonidan ekstremistik deb tan olingan “Kurdiston ishchilar partiyasi” bilan ham aloqadordir.
Iyul oxirida Turkiya janubida issiq va quruq havo sharoitida o‘rmon yong‘inlari boshlandi. Hukumat taqdim etgan so‘nggi ma’lumotlarga ko‘ra, Antalya viloyatidagi Manavgat kurort shahrida yetti kishi yong‘in qurboni bo‘lgan. Marmarisda yana bir kishi halok bo‘lgan. Jabrlanganlarning umumiy soni 864 kishiga yetdi.
Avvalroq Erdo‘g‘on yong‘inlar yuzasidan tergov olib borishda o‘t qo‘yish versiyasi istisno qilinmayotganini aytgandi. “Biz yong‘inlar sabablarini diqqat bilan tekshiramiz. Agar o‘z vataniga o‘t qo‘yishga qodir shunday xoinlar bo‘lsa, ular eng shafqatsiz jazoga loyiq bo‘ladi”, — degandi u.
Keyinroq Turkiya hukumati mamlakat janubidagi yong‘inlar yuzasidan bir kishi hibsga olinganini ma’lum qildi.
Izoh (0)