Эрон президенти лавозимини тарк этаётган Ҳасан Руҳоний ўзи ҳукмронлик қилган йиллардаги ҳукуматнинг хато ҳаракатлари учун халқдан кечирим сўради. Бу ҳақда у Вазирлар Маҳкамасининг ўзи бошчилигидаги сўнгги йиғилишида айтиб ўтди, деб ёзади Anadolu Agency.
«Бугун Эроннинг 12-ҳукуматининг охирги йиғилиши бўлиб ўтди. Шунингдек, бу менинг Ислом Республикаси президенти сифатида сўнгги баёнотим. Ўтган йилларда биз ўз баёнотларимизда одамларни алдамадик. Ҳақиқатни гапирдик. Бироқ айрим ҳақиқатларни яширишга мажбур бўлган пайтларим ҳам бўлди, чунки мен уларни бефойда деб ҳисоблардим ёки улар миллий бирликни бузиши мумкинлигидан қўрқардим», — деди Руҳоний.
Руҳонийнинг таъкидлашича, президентлигининг биринчи муддатида (2013—2017 йиллар) Эрон жаҳон ҳамжамияти билан ҳамкорлик қилган ва истиқболли иқтисодий шароитларга эга бўлган. Бироқ 2018 йилда АҚШ ядровий битимдан чиқиб, Эронга қарши санкцияларни қайта тиклаганидан кейин вазият ўзгарди. Санкциялар мамлакатни иқтисодий уруш марказига олиб кирди.
Эрон президентининг сўзларига кўра, унинг ҳукуматининг уринишларига қарамай, мамлакатдаги айрим кучлар санкцияларни олиб ташлашга тўсқинлик қилган.
«Агар миллий бирлик кучлироқ бўлганида ва барча давлат органлари ҳукуматни қўллаб-қувватлаб, биз билан ҳамкорлик қилганида, мамлакатдаги вазият бундан бир неча баробар яхши бўларди», — деди у.
Руҳоний йўл қўйилган хатолар учун халқдан кечирим сўради, амалга оширилган ишлар учун ҳукумат аъзоларига миннатдорчилик билдирди.
«Биз сиёсатимизда камроқ хато ва камчиликларга йўл қўйишга ҳаракат қилдик. Аммо агар қандайдир хатолар бўлса, мен бунинг учун халқдан кечирим сўрайман», — деди у.
Руҳонийнинг сўзларига кўра, «аҳоли турмуш даражасидаги вазиятдан норози ва бунга ҳақли». «Аммо биз иқтисодий уруш ҳолатида бўлганимизни тушуниб, шу нуқтаи назардан нима қилишимиз мумкинлигини кўриб чиқиш керак», —дея қўшимча қилди у АҚШнинг собиқ президенти Дональд Трамп даврида қўйилган санкцияларни назарда тутиб.
Эронда президент сайловлари июнь ойида бўлиб ўтди. Мамлакатнинг янги сайланган президенти Иброҳим Раисий 3 августда ўз лавозимига киришади, унинг инаугурация маросими 5 августда бўлиб ўтади.
Июль охирида Эронда ичимлик суви етишмаслиги туфайли норозилик намойишлари бўлиб ўтганди. Хузистон вилоятидаги норозилик намойишлари туфайли амалдаги президент Ҳасан Руҳоний даврининг сўнгги ҳафталари оғир кечди. Сайланган президент Иброҳим Раисий инаугурациясини кутмасдан мамлакатда тартибни тиклашга киришди.
Қайд этиш керакки, Эроннинг янги президенти — АҚШ санкцияларига учраган диндор консерватор. У 1988 йилда режимнинг минглаб душманларини қатл қилганликда айбланиб келмоқда.
Изоҳ (0)