Tojikistonda AQSh yordamida qayta ta’mirlangan Afg‘oniston bilan chegara posti faoliyatini boshladi

Tojikistonning Afg‘oniston bilan chegarasida AQShning moliyaviy ko‘magi yordamida qayta ta’mirlangan post ochildi. Bu haqda Tojikistonning “Xovar” axborot agentligi xabar qilgan.

Tojikiston va AQSh hukumatlari hamkorligida 30-iyul kuni Xatlon viloyatida Tojikiston respublikasi davlat xavfsizlik qo‘mitasi chegara qo‘shinlarining posti foydalanishga topshirilgan. Ochilish marosimida Tojikiston chegara qo‘shinlari qo‘mondoni o‘rinbosari Rajab Saodatzoda hamda AQShning Dushanbedagi ishonchli vakili vazifasini vaqtincha bajarayotgan Jon Ginkel ishtirok etgan.

Chegara o‘tkazish punktini qayta ta’mirlashning qiymati 570 ming AQSh dollariga baholanmoqda. Mazkur postda qo‘shimcha kuzatuv imkoniyatlari, Xatlon viloyatining Shahritus tumanidagi chegarada patrul tadbirlarini o‘tkazish uchun zarur sharoitlar yaratilgan. Qayta ta’mirlangan post chegara qo‘shinlarining chegarani buzib o‘tish holatlarini aniqlash, shubhali harakatlarni kuzatish imkoniyatlarini ko‘paytirishi va transmilliy xavf-xatarlarni oldini olish, xususan, noqonuniy yo‘llar bilan giyohvand moddalarni olib kirish, kontrabanda va qurolli ekstremizmni barataf etishdagi imkoniyatlarini oshiradi.

O‘z navbatida AQShning Tojikistondagi elchixonasi o‘z rasmiy saytida Xatlon viloyati Shahritus tumanidagi chegara o‘tkazish punktini ta’mirlashga 570 ming dollar ajratilganini ma’lum qilgan.

“AQSh Tojikiston xavfsizligi va suverenitetini qo‘llab-quvvatlash, Afg‘onistonda tinchlik hamda barqarorlikni ta’minlash uchun hamisha hamkorlikka tayyorligini bildiradi”, – deyiladi elchixona xabarida.

2007-yilda AQSh giyohvandlikka qarshi kurash va harbiy hamkorlik boshqarmasi Tojikistonga chegara zastavalarini ta’mirlash uchun 155 million dollardan ko‘proq mablag‘ ajratgan.

“Qo‘shma Shtatlar Tojikiston bilan 30 yildan buyon hamkorlik qiladi va ushbu davr mobaynida mamlakat taraqqiyoti uchun, xususiy sektor, qishloq xo‘jaligi, sog‘liqni saqlash, demokratik institutlar va Tojikiston xavfsizligi uchun 1,8 milliarddan ko‘proq mablag‘ ajratgan”, – deyilgan xabarda.

Eslatib o‘tamiz, 14-aprelda AQSh prezidenti Jo Bayden Afg‘oniston hududidan mamlakat qo‘shinining olib chiqilishini e’lon qildi. Qo‘shinni olib chiqish, avgust oxiri sentabr boshlarida yakuniga yetadi. AQSh qo‘shini Afg‘oniston hududidan olib chiqib ketish boshlanganidan beri “Tolibon” harakati bir nechta yo‘nalishdagi hujum harakatlarini jadallashtirgan. “Tolibon” vakillari bergan bayonotga ko‘ra harakat mamlakatning taxminan 85 foiz qismida boshqaruvni o‘z nazoratiga olgan. Xususan, Afg‘onistonning beshta davlat: Eron, Xitoy, Pokiston, Tojikiston va Turkmaniston bilan chegara qismi “Tolibon” vakillari tomonidan egallangan.