Gvatemalada minglab odamlar mamlakat prezidenti Alexandro Jammatey va bosh prokurorning iste’fosini talab qilib, ommaviy namoyishlar o‘tkazdi. Bu haqda Reuters xabar qilgan.
Minglab odamlar prezident saroyidan bosh prokuror ofisigacha bo‘lgan masofani piyoda “Jammatey iste’foga chiq!” so‘zlari yozilgan bannerlar va shunday hayqiriqlar bilan bosib o‘tdi. Namoyishchilar mashinalar shinalarini yoqib, hukumat binolarini qo‘riqlayotgan politsiya xodimlariga qizil bo‘yoqlar otgan.
Namoyishlar o‘tgan haftada korrupsiyaga qarshi kurashchi, jazo bermaslikka qarshi kurash maxsus prokuraturasi rahbari Xuan Fransisko Sandovalning bosh prokuror Mariya Porras tomonidan ishdan olinganidan keyin boshlangan.
Bir hafta avval mamlakatdan qochib ketgan Sandoval bosh prokuror uning prezident Jammateyning korrupsiyaga aloqadorligi yuzasidan tergov o‘tkazishiga ruxsat bermaganini ta’kidlagan. Prezidentning o‘zi esa korrupsiyaga aloqadorligini inkor etmoqda.
“Sandoval o‘z mafkurasiga qarshi bo‘lgan odamlarni ta’qib qilmoqchi bo‘ldi”, – degan bosh prokuror.
Shuningdek, Porras mahalliy telekanallardan biriga bergan intervyusida hamisha shaffof ishlashga intilib kelganini qayd etgan.
Avval Tunisda namoyishlar tufayli komendantlik soati joriy qilingani, AQSh Tunis rahbarini muxolifat bilan muzokaralarga chaqirgani, Yevropada koronavirus cheklovlariga qarshi ommaviy noroziliklar bo‘lib o‘tgani, Fransiya, Buyuk Britaniya, Italiya va Gretsiyada namoyishchilar ko‘chalarga chiqqani haqida xabarlar berilgan.
Izoh (0)