Qozog‘istonda bir sutkada 7778 kishida COVID-19 aniqlandi. Bu pandemiya boshidan beri eng yuqori ko‘rsatkich

Qozog‘istonda o‘tgan sutka davomida 7778 kishida koronavirus aniqlandi. Bu pandemiya boshidan buyon eng yuqori  ko‘rsatkich, deb yozadi “Nur.kz”.

Bundan avval sutkalik rekord 29-iyulda qayd etilgan. Sog‘liqni saqlash vazirligi ma’lumotlariga ko‘ra, o‘sha kuni mamlakatda COVID-19’ga chalinish bo‘yicha 7479 ta holat aniqlangan.

Yangi kasallanish holatlarining ko‘pligi bo‘yicha Olmaota shahri yetakchilik qilmoqda — 1680 kishi. Ikkinchi o‘rinda Qozog‘iston poytaxti Nur-Sulton turibdi, poytaxtda o‘tgan sutkada 1555 kishida infeksiya qayd etilgan.

Qozog‘iston Sog‘liqni saqlash vazirligi ma’lumotlarida COVID-19’ga chalinganlik to‘g‘risida laboratoriyada tasdiqlangan holatlar bilan birga PZR-testining natijasi salbiy bo‘lsa-da, infeksiyaning klinik va epidemik belgilari bo‘lgan pnevmoniya holatlari ham hisobga olinadi.

Sog‘liqni saqlash vazirligining Facebook’da nashr etilgan ma’lumotlaridan kelib chiqadigan bo‘lsak, 2020-yil 1-avgustdan beri mamlakatda 60 584 kishida shunday pnevmoniya holatlari aniqlangan, ularning 3697 nafari vafot etgan. 28-iyul kuni koronavirus testining natijalari salbiy bo‘lgan 304 kishida infeksiya belgilari qayd etildi.

O‘tgan kun davomida mamlakatda COVID-19 bilan og‘rigan 80 kishi vafot etdi. COVID-19 tasdiqlanmagan yana 21 bemor virusli pnevmoniyadan vafot etdi.

Avvalroq Qozog‘istonda koronavirusga chalinganlar soni bo‘yicha kunlik rekord yangilangani, Nur-Sultonda karantin cheklovlari yana kuchaytirilgani, poytaxtda koronavirusning “hindcha” shtammi qayd etilgani haqida xabarlar berilgandi.