Qirg‘izistonning Botken viloyati Tosh-Tumshuq qishlog‘ida tojikistonlik fuqarolar viloyat rahbarining mashinasini toshbo‘ron qildi. Bu haqda Kloop xabar berdi.
29-iyul kuni Qirg‘iziston prezidentining Botken viloyatidagi qishloqlarni tiklash bo‘yicha maxsus vakili Ma’mirjon Rahimov, prezidentning viloyatdagi muxtor vakili birinchi o‘rinbosari Ma’rufxon Tulayev va Oq-Soy qishlog‘i rahbari Alimbek Sobirov Oq-Soy qishlog‘ida qurilgan uylarni ko‘zdan kechirib bo‘lgach, Tosh-Tumshuq qishlog‘iga tashrif buyurgan. Rasmiylar u yerda ham yonib ketgan uylarni ko‘zdan kechirgan.
Taxminan, soat 20:10 da hududga yaqin Tojikistonga tegishli Xo‘ja A’lo qishlog‘ida yashovchi 15-20 nafar Tojikiston fuqarosi mansabdorlar yoniga kelgan. Natijada janjal bo‘lib, tojikistonliklardan biri rasmiylarning mashinasiga tosh otgan. Sobirov, shuningdek, Xo‘ja A’lo qishlog‘i aholisi uni kaltaklaganini aytgan.
“Rasmiylar bilan birgalikda vayron qilingan uylarni tekshirish uchun Tosh-Tumshuqqa kelgandik. Bahorgi mojaroda Tojikiston aholisi qishloqdagi uchta uyni yoqib yuborgan. Biz turgan joyda Xo‘ja A’lo aholisi yig‘ilib, provokatsiya qilishni boshladi. Men Tosh-Tumshuqqa tez-tez borib turaman, u yerdagilar meni taniydi. Olomon orasidan ikki kishi menga tashlandi. Ular mashinamning oynasini sindirdi. Hozir tibbiy ko‘rikdan o‘tishga keldim”, — degan u jurnalistlarga.
Muxtor vakolatxona xabariga ko‘ra, shundan keyin ikki mamlakat huquq-tartibot organlari vakillari chegarada uchrashib, voqeani o‘rganishni boshlagan.
“Tojikistonning Isfara viloyati Ichki ishlar boshqarmasi boshlig‘i Tojikiston fuqarolarining noqonuniy xatti-harakatlari masalasi ko‘rib chiqilishini, yetkazilgan moddiy zarar qoplanishini, tosh otgan Tojikiston fuqarolariga nisbatan qonun doirasida choralar ko‘rilishini va’da qildi. Ayni paytda Qirg‘izistonning Botken viloyati va Tojikistonning Isfara viloyati hokimlari, shuningdek, ikki mamlakatning mintaqaviy huquq-tartibot idoralari vakillari o‘rtasida uchrashuv bo‘lib o‘tmoqda”, — deyiladi vakolatli idorada.
Eslatib o‘tamiz, aprel oyi oxirida Qirg‘iziston va Tojikistonning chegaraoldi viloyatlari aholisi o‘rtasidagi ziddiyat ikki mamlakat harbiylarining qurolli to‘qnashuviga aylanib ketgandi. Qirg‘iz-tojik chegarasidagi nizolarda 50 dan ortiq odam halok bo‘lgan, 300 dan ortiq uylar va infratuzilma obyektlari vayron qilingan, ayrim binolar yonib ketgan. 29-aprel oqshomida tomonlar nizoni to‘xtatish va chegaradan harbiy kuchlarni olib ketish to‘g‘risida kelishib olgan, ammo ertasi kuni yana otishma boshlangan. 30-aprel kuni tushdan keyin navbatdagi sulhga erishildi. 3-may kuni Qirg‘iziston va Tojikiston o‘z harbiy kuchlarini chegara chizig‘idan olib chiqishni yakunladi.
5-iyun kuni Tojikiston va Qirg‘iziston davlat xavfsizlik qo‘mitalari rahbarlari chegaradan qo‘shinlarni olib ketish haqida kelishib oldi.
Izoh (0)