Қозоғистонда бир суткада 7778 кишида COVID-19 аниқланди. Бу пандемия бошидан бери энг юқори кўрсаткич

Қозоғистонда ўтган сутка давомида 7778 кишида коронавирус аниқланди. Бу пандемия бошидан буён энг юқори  кўрсаткич, деб ёзади «Nur.kz».

Бундан аввал суткалик рекорд 29 июлда қайд этилган. Соғлиқни сақлаш вазирлиги маълумотларига кўра, ўша куни мамлакатда COVID-19’га чалиниш бўйича 7479 та ҳолат аниқланган.

Янги касалланиш ҳолатларининг кўплиги бўйича Олмаота шаҳри етакчилик қилмоқда — 1680 киши. Иккинчи ўринда Қозоғистон пойтахти Нур-Султон турибди, пойтахтда ўтган суткада 1555 кишида инфекция қайд этилган.

Қозоғистон Соғлиқни сақлаш вазирлиги маълумотларида COVID-19’га чалинганлик тўғрисида лабораторияда тасдиқланган ҳолатлар билан бирга ПЗР-тестининг натижаси салбий бўлса-да, инфекциянинг клиник ва эпидемик белгилари бўлган пневмония ҳолатлари ҳам ҳисобга олинади.

Соғлиқни сақлаш вазирлигининг Facebook’да нашр этилган маълумотларидан келиб чиқадиган бўлсак, 2020 йил 1 августдан бери мамлакатда 60 584 кишида шундай пневмония ҳолатлари аниқланган, уларнинг 3697 нафари вафот этган. 28 июль куни коронавирус тестининг натижалари салбий бўлган 304 кишида инфекция белгилари қайд этилди.

Ўтган кун давомида мамлакатда COVID-19 билан оғриган 80 киши вафот этди. COVID-19 тасдиқланмаган яна 21 бемор вирусли пневмониядан вафот этди.

Аввалроқ Қозоғистонда коронавирусга чалинганлар сони бўйича кунлик рекорд янгилангани, Нур-Султонда карантин чекловлари яна кучайтирилгани, пойтахтда коронавируснинг «ҳиндча» штамми қайд этилгани ҳақида хабарлар берилганди.