Туркия ва Озарбайжон қўшма турк армиясини ташкил этиш бўйича музокаралар олиб бормоқда. Бу ҳақда Туркия парламенти спикери Мустафо Шентоп матбуот анжумани чоғида маълум қилди, деб ёзмоқда «РБК».
«Бизнинг ғоямиз — бир миллат, икки давлат. Ҳар доим шундай бўлади. Шунинг муносабати билан кўплаб музокаралар ва келишувлар бўлиб ўтди», — деди Мустафо Шентоп.
Унинг сўзларига кўра, келишувлар доирасида, хусусан, икки мамлакатнинг ҳарбий машғулотлари ўтказилмоқда. Унинг таъкидлашича, Боку ва Анқара иқтисодий ҳамкорликни кучайтириш бўйича чоралар кўрмоқда.
«Маълумки, шу йилнинг март ойида Туркия ва Озарбайжон ўртасида имтиёзли савдо тўғрисида битим тасдиқланганди. Айни пайтда эркин савдо шартномаси устида иш олиб борилмоқда. Имзолангандан сўнг ушбу ҳужжат бизнинг иқтисодий алоқаларимизни янада мустаҳкамлайди», — деди сиёсатчи.
Арманистон ва Озарбайжон чегарасидаги вазият ҳақида гапирар экан, Шентоп Арманистон ҳарбийлари томонидан Озарбайжоннинг чегараолди ҳудудлари ўққа тутилиши минтақанинг хавфсизлигига таҳдид, шунингдек, ҳудудий урушга олиб келиши мумкинлигини айтди.
«Агар бу провокациялар тўхтамаса, унда янада аччиқ оқибатлар муқаррар. Жаҳон ҳамжамияти Арманистонни минтақа тинчлигига таҳдид солувчи провокацияларни тўхтатишга чақириши лозим», — дея қўшимча қилди у.
Шунингдек, парламент спикери Зангезур йўлагини очиш Озарбайжон учун ҳам, Туркия учун ҳам муҳим эканини таъкидлади. Унинг сўзларига кўра, бу Озарбайжоннинг асосий қисми ва Нахичеван, Озарбайжон ва Туркия, шунингдек, Туркия ва Осиё мамлакатлари ўртасида қуруқлик йўлини яратишга ёрдам беради. «Тегишли келишувга эришилди, энди барча томонлар ўз сўзида туриши лозим. Йўлак очиқ бўлиши керак », — дея хулоса қилди Шентоп.
Июнь ойида Туркия ва Озарбайжон президентлари иттифоқчилик тўғрисида декларация имзолаганди. Келишувдан сўнг Туркия президенти Ражаб Эрдўғон Озарбайжонда Туркия ҳарбий базаси яратилиши мумкинлигини истисно қилмаган.
2020 йилнинг сентябрь ойи охирида Тоғли Қорабоғда Озарбайжон ва Арманистон давлатлари ўртасида қуролли низо келиб чиққан эди. 2020 йилнинг 10 ноябрида ўт очишни тўхтатиш тўғрисидаги уч томонлама келишув имзоланиши билан низолар якунига етди.
Келишувга мувофиқ, Тоғли Қорабоғнинг муҳим қисми Озарбайжон ҳарбийлари назорати остига ўтди ва тинчлик шартномасига риоя этилишини назорат қилиш Россия тинчликпарвар кучларига топширилди. Қўшма кузатув маркази ишида бир неча ўнлаб туркиялик ҳарбийлар ҳам иштирок этмоқда. Илҳом Алиев Озарбайжонга тажовуз қилинса, Туркиядан ҳарбий ёрдам сўрашга тайёрлигини маълум қилган.
Изоҳ (0)