Rossiya Afg‘onistondagi vaziyat bilan bog‘liq holda Tojikistonga qo‘shimcha qurol-yarog‘ va uskunalar yetkazib berishni yo‘lga qo‘ydi, qurollar bepul topshiriladi. Bu haqda Rossiya mudofaa vaziri Sergey Shoygu Tojikiston mudofaa vaziri Sherali Mirzo bilan muzokaralarda aytib o‘tgan. Shoyguning so‘zlariga ko‘ra, Moskva ziddiyatni hal qilish uchun Dushanbega har qanday zarur yordamni ko‘rsatishga tayyor.
“Tojikiston armiyasini jihozlash uchun Rossiyaning qo‘shimcha qurol-yarog‘ va texnikalarini bepul yetkazib berish tashkil etildi”, — dedi Shoygu.
Mudofaa vazirining qo‘shimcha qilishicha, Rossiya harbiylari Tojikistonga malakali harbiy kadrlar tayyorlashda ham yordam bermoqda. Ofitserlar Rossiyaning ixtisoslashtirilgan oliy o‘quv yurtlarida va Rossiyaning Tojikistondagi 201-harbiy bazasida tayyorlanmoqda. Rossiyaning chet eldagi eng yirik harbiy obyekti hisoblanadigan mazkur harbiy baza Dushanbe va Bo‘xtar shaharlarida joylashgan.
Shoyguning so‘zlariga ko‘ra, Rossiya harbiy kuchlari ushbu bazaning jangovar salohiyatiga e’tiborni kuchaytirmoqda. Mamlakatlar Afg‘onistondan jangarilar kirib kelishining oldini olish uchun birgalikda tayyorgarlik ko‘rmoqda.
Shoygu Afg‘onistondagi voqealar Tojikiston xavfsizligiga tahdid solsa, 201-baza qo‘shinlari mamlakatga harbiy yordam berishini va’da qildi.
Shoyguning so‘zlariga ko‘ra, Kollektiv Xavfsizlik Shartnomasi tashkiloti (KXShT)ga a’zo davlatlarning birortasiga xavf tug‘ilgan taqdirda, Rossiya jim qarab turmaydi va birinchi navbatda Tojikiston hududidagi 201-baza bilan harakatga kirishadi.
“201-baza Markaziy Osiyodagi KXShT a’zolarining barqarorligi va osoyishtaligini saqlash uchun ushbu mintaqada turibdi”, — dedi mudofaa vaziri.
Uning ta’kidlashicha, Rossiya harbiylari Afg‘oniston hududida turli mamlakatlardan, shu jumladan, Suriya va Liviyadan kelgan IShID jangarilarining faol harakatlarini qayd etmoqda.
Avvalroq Putin afg‘on-tojik chegarasidagi vaziyatning keskinlashuvi munosabati bilan Tojikistonga yordam berishni va’da qilgandi.
Izoh (0)