Parkentda noyob hayvonlarni ovlab, go‘shtini koronavirusga davo sifatida sotgani aytilgan ovchi yuzasidan ma’lumot berildi

Ijtimoiy tarmoqlarda Toshkent viloyati Parkent tumani Qiziltog‘ shaharchasida istiqomat qiluvchi fuqaro tomonidan Qizil kitobga kiritilgan turli xildagi noyob hayvonlar noqonuniy ovlanib, go‘shtlari COVID-19’ga davo sifatida sotilayotgani xabar qilindi.

Holat yuzasidan Toshkent viloyati Ekologiya va atrof-muhitni muhofaza qilish sohasida nazorat inspeksiyasining Parkent tumani bo‘limi xodimlari tomonidan surishtiruv ishlari amalga oshirildi hamda xabarda zikr etilgan ovchidan yozma tushuntirish xati olindi. Bu haqda viloyat Ekologiya va atrof-muhitni muhofaza qilish boshqarmasi axborot xizmati xabar berdi.

Surishtiruv davomida fuqaro 2005-yildan buyon ovchilar jamiyati birlashmasiga a’zoligi hamda sport va havaskorlik tarzida qonunda belgilangan tartibda ovchilik faoliyati bilan shug‘ullanib kelishini ta’kidlab o‘tdi.

Bundan tashqari, ijtimoiy tarmoqlarda keng munozaraga sabab bo‘lgan mazkur postdagi fotosuratlar fuqaroning 2012—2015-yillar davomida Rossiyada Ovchilik xo‘jaligida faoliyat olib borgan davrlarida olingani hamda dastlab uning o‘zi tomonidan ijtimoiy tarmoqqa joylashtirilganligi aniqlandi.

Shuningdek, fuqaroning ta’kidlashicha, 2021-yil 24-iyul kuni o‘rta yoshli shaxs tomonidan unga qo‘ng‘iroq qilinib, onasi betobligi tufayli jayra yoki bo‘rsiq go‘shti kerakligi so‘ralgan. Fuqaro qo‘ng‘iroq egasiga hozirda ov mavsumi yopiqligi uchun ovchilik faoliyati bilan shug‘ullanmayotgani, ov mavsumi boshlanganda shunday hayvonlardan qonuniy ravishda o‘lja olsa, so‘ralgan nimtani yetkazib berishi mumkinligini ma’lum qilgan.

Jurnalist va blogerlardan asoslanmagan hamda eski ma’lumotlarni ijtimoiy tarmoqlarga joylab, yolg‘on shov-shuvlarni tarqatmaslik so‘ralgan boshqarma bayonotida.

Shuningdek, Davlat ekologiya qo‘mitasi tomonidan 2021-yilda jayra, yovvoyi to‘ng‘iz va bo‘rilarni tabiatdan ovlashga O‘zbekiston ovchi va baliqchilar sport birlashmasi hamda Davlat qo‘riqxonalari milliy tabiat bog‘lari va ovchilik boshqarmasiga kvota ajratilgan.

Fuqaro A.M.ga Davlat ekologiya qo‘mitasi tomonidan 2021-yil uchun yovvoyi hayvonlarni ovlashga kvota ajratilmagan hamda yovvoyi hayvonlarni tabiatdan ovlashga ruxsatnoma rasmiylashtirilmagan.