Prezident Shavkat Mirziyoyev 26-iyul kuni “Aholiga ko‘rsatilayotgan tibbiy yordam sifatini yanada yaxshilash chora-tadbirlari to‘g‘risida”gi qarorni imzoladi.
Hujjat bilan 2021—2022-yillar davomida tuman (shahar) tibbiyot birlashmalari tarkibida 35 ta Tumanlararo qo‘shma shikastlanishlar va o‘tkir qon tomir kasalliklari markazlarini bosqichma-bosqich tashkil etishni nazarda tutadi.
Quyidagilar markazlarning asosiy vazifalari etib belgilangan:
- “Oltin soat” tamoyili asosida qo‘shma shikastlanishlar hamda o‘tkir qon tomir kasalliklari bilan tibbiy yordamga muhtoj bemorlarga shoshilinch va ixtisoslashtirilgan tibbiy yordam ko‘rsatishni tashkil etish;
- o‘tkir va surunkali buyrak yetishmovchiligi mavjud bemorlarga gemodializ xizmatini ko‘rsatish;
- markazlarga biriktirilgan tuman (shahar)lar aholisiga Sog‘liqni saqlash vazirligi tomonidan tasdiqlangan tartibda tibbiy xizmat ko‘rsatish.
Shuningdek, qaror bilan 2021—2023-yillarda bolalar, tug‘ish yoshidagi, homilador va bola emizuvchi ayollarni profilaktik maxsus preparatlar bilan bepul ta’minlash chora-tadbirlari dasturi tasdiqlangan:
- 6-23 oylik bolalar uchun uy sharoitida tayyorlangan ovqatlarni boyitish maqsadida mikronutriyent kukuni bilan;
- 6 oylikdan 5 yoshgacha bo‘lgan bolalarni A vitamin bilan;
- 2-10 yoshdagi bolalarni gelmintoz profilaktikasi bo‘yicha maxsus preparatlar bilan;
- Homilador va bola emizuvchilar ayollar hamda 3-15 yoshdagi bolalarni yod preparati bilan;
- 35 yoshgacha tug‘ish yoshidagi ayollarni temir va foliy kislotasi preparati bilan.
Bundan tashqari, aholiga ko‘rsatilayotgan nefrologiya va gemodializ yordamini yanada takomillashtirish chora-tadbirlari rejasi ham tasdiqlangan:
- hududlarning umumiy o‘rinlar fondi hisobidan nefrologiya va gemodializ bo‘limlarini 50 o‘ringacha yetkazish;
- dializ apparatlari va sarflash vositalarini xarid qilish;
- 2021/2022-o‘quv yilidan boshlab oliy tibbiyot ta’lim muassasalarida nefrologiya va gemodializ kafedralari faoliyatini yo‘lga qo‘yish;
- Respublika ixtisoslashtirilgan nefrologiya va buyrak transplantatsiyasi ilmiy-amaliy tibbiyot markazi binolarini qurish va rekonstruksiya qilish.
Izoh (0)