Toshkent tibbiyot akademiyasi klinikasining bo‘sh turgan hududi Respublika onkologiya markaziga beriladi

Toshkent tibbiyot akademiyasi klinikasining bo‘sh turgan hududida Respublika ixtisoslashtirilgan onkologiya va tibbiy radiologiya ilmiy-amaliy tibbiyot markazi barpo etiladi. Bu haqda “Sog‘liqni saqlash sohasida ixtisoslashtirilgan tibbiy yordam ko‘rsatish tizimini yanada takomillashtirish chora-tadbirlari to‘g‘risida”gi Prezident qarorida belgilandi.

Qayd etilishicha, kompleksning quvvati kamida 650 ta statsionar va 100 ta kunduzgi statsionar o‘rindan iborat bo‘ladi.

Respublika ixtisoslashtirilgan onkologiya va tibbiy radiologiya ilmiy-amaliy tibbiyot markazi kompleks foydalanishga topshirilgandan keyin unga ushbu markazning Toshkent shahar va Toshkent viloyati filiallarini qo‘shib olish yo‘li bilan qayta tashkil etiladi.

Toshkent shahar hokimligi, Qurilish vazirligi, Sog‘liqni saqlash vazirligi Janubiy Koreya tajribasini hamda zamonaviy tibbiy asbob-uskunalar bilan jihozlashni hisobga olgan holda kompleksni qurish va jihozlash bo‘yicha loyiha-smeta hujjatlarini ishlab chiqib, 2021-yilning yakuniga qadar qurilish ishlarini boshlash vazifasi yuklatildi.

Hujjatga ko‘ra, Respublika ixtisoslashtirilgan onkologiya va tibbiy radiologiya ilmiy-amaliy tibbiyot markazi 2023-yilning 1-apreliga qadar foydalanishga topshiriladi.

Eslatib o‘tamiz, Shavkat Mirziyoyev may oyining o‘rtalarida Respublika ixtisoslashtirilgan onkologiya va radiologiya ilmiy-amaliy tibbiyot markaziga borib, bu yo‘nalishdagi shifoxonalarda sharoitlarni yaxshilash bo‘yicha topshiriqlar bergan edi. Ulardan kelib chiqib, 27-may kuni Prezidentning “Aholiga gematologiya va onkologiya xizmatlarini ko‘rsatish tizimini yanada takomillashtirish to‘g‘risida”gi qarori qabul qilindi.

Ushbu qarorga muvofiq, Respublika onkologiya va radiologiya tibbiyot markazi uchun yangi inshoot qurish belgilangan. Shu maqsadda Toshkent tibbiyot akademiyasi klinikasi hududidan 5 gektardan ziyod yer ajratilgan. Xorijiy tibbiyot muassasalarining ilg‘or tajribasi, shifokor va bemorlar uchun barcha sharoitlar hisobga olinib, loyiha ishlab chiqilgan. Xususan, bu borada Janubiy Koreyaning Daedong Medical Consulting kompaniyasi bilan hamkorlikda ish olib borilmoqda.

Shuningdek, qarorga binoan, onkologiya xizmatini rivojlantirish bilan bog‘liq xarajatlar uchun davlat budjetidan 2021-yilda qo‘shimcha 60 milliard so‘m, 2022-yildan boshlab 125 milliard so‘mdan kam bo‘lmagan miqdorda mablag‘ ajratilishi belgilangan.