O‘zbekistonda 2021-yilning birinchi yarmida davlat aktivlari jami 1,1 trillion so‘m (105 million dollar)ga sotildi. Taqqoslash uchun: o‘tgan to‘rt yil (2016—2020) ichida davlat xususiylashtirishdan atigi 150 million dollar ishlab topgan. Bu haqda Davlat aktivlarini boshqarish agentligi (DABA) direktori Akmalxon Ortiqov IntelliNews’ga bergan intervyusida ma’lum qildi, deya xabar bermoqda “Gazeta.uz”.
Unga ko‘ra, 2021-yilning olti oyida obyektlarni sotishdan tushgan mablag‘larning aksariyati (80 million dollar) 10 ta yirik obyekt hisobiga to‘g‘ri keldi. Ichan qal’a mehmonxonasi va Davlat xavfsizlik xizmatining sobiq ma’muriy binosi shular jumlasidan.
Shuningdek, 2021-yilda 900 dan ortiq davlat aktivlari sotuvga qo‘yiladi.
“Agar biz o‘z maqsadlarimizga erishsak, bu yil xususiylashtirish jarayonidan 600 million dollargacha daromad olishni kutmoqdamiz”, — dedi Akmalxon Ortiqov.
Savdoga qo‘yilgan aktivlar orasida O‘zbekistondagi ikkinchi eng yirik neftni qayta ishlash zavodi — Farg‘ona neftni qayta ishlash zavodining 100 foizi, Coca-Cola Bottlers Uzbekistan kompaniyasining nazorat paketi (57,1 foiz), Kafolat sug‘urta kompaniyasining 48 foizi va to‘qqizta sharob va spirtli ichimliklar ishlab chiqaruvchisi bor. Moliya sohasida DABA ikkita kichik bank — Poytaxt banki va “O‘zagroeksportbank” uchun taklif olgan.
Agentlik rahbari davlat aktivlarini sotishda favqulodda muvaffaqiyat qozonishining sabablaridan biri baholash bilan bog‘liq deb hisoblaydi. Nashr Akmalxon Ortiqovga iqtibos keltirgan holda, o‘tmishdagi muvaffaqiyatsiz xususiylashtirishning asosiy sababi bozor kutilmalariga mos kelmaydigan real bo‘lmagan taxminlar ekanligini ta’kidladi.
“Ayni paytda biz ushbu yangi standartlar xalqaro moliya institutlari ko‘magi bilan ishlab chiqilgan bo‘lsa ham, nima uchun ishlamayotganini tanqidiy ravishda baholayapmiz. Bizning mahalliy baholovchilarimiz kompaniyalarni baholaganda, ular taklif qilgan narx kompaniyalarning bozor qiymatini aks ettirmaydi. Bu narx yoki juda qimmat, yoki obyektiv narxdan ancha past bo‘ladi”, — dedi Akmalxon Ortiqov.
Bundan avval “Beldirsoy” dam olish maskani dor yo‘li bilan birga qo‘shib sotilishi mumkinligi hamda Gulnora Karimovaga tegishli bo‘lgan “Sijjak” oromgohiga xaridor chiqmagani sabab uni sotib olishga takliflarni qabul qilish muddati uzaytirilgani haqida xabar berilgandi.
Izoh (0)