Паркентда ноёб ҳайвонларни овлаб, гўштини коронавирусга даво сифатида сотгани айтилган овчи юзасидан маълумот берилди

Ижтимоий тармоқларда Тошкент вилояти Паркент тумани Қизилтоғ шаҳарчасида истиқомат қилувчи фуқаро томонидан Қизил китобга киритилган турли хилдаги ноёб ҳайвонлар ноқонуний овланиб, гўштлари COVID-19’га даво сифатида сотилаётгани хабар қилинди.

Ҳолат юзасидан Тошкент вилояти Экология ва атроф-муҳитни муҳофаза қилиш соҳасида назорат инспекциясининг Паркент тумани бўлими ходимлари томонидан суриштирув ишлари амалга оширилди ҳамда хабарда зикр этилган овчидан ёзма тушунтириш хати олинди. Бу ҳақда вилоят Экология ва атроф-муҳитни муҳофаза қилиш бошқармаси ахборот хизмати хабар берди.

Суриштирув давомида фуқаро 2005 йилдан буён овчилар жамияти бирлашмасига аъзолиги ҳамда спорт ва ҳаваскорлик тарзида қонунда белгиланган тартибда овчилик фаолияти билан шуғулланиб келишини таъкидлаб ўтди.

Бундан ташқари, ижтимоий тармоқларда кенг мунозарага сабаб бўлган мазкур постдаги фотосуратлар фуқаронинг 2012—2015 йиллар давомида Россияда Овчилик хўжалигида фаолият олиб борган даврларида олингани ҳамда дастлаб унинг ўзи томонидан ижтимоий тармоққа жойлаштирилганлиги аниқланди.

Шунингдек, фуқаронинг таъкидлашича, 2021 йил 24 июль куни ўрта ёшли шахс томонидан унга қўнғироқ қилиниб, онаси бетоблиги туфайли жайра ёки бўрсиқ гўшти кераклиги сўралган. Фуқаро қўнғироқ эгасига ҳозирда ов мавсуми ёпиқлиги учун овчилик фаолияти билан шуғулланмаётгани, ов мавсуми бошланганда шундай ҳайвонлардан қонуний равишда ўлжа олса, сўралган нимтани етказиб бериши мумкинлигини маълум қилган.

Журналист ва блогерлардан асосланмаган ҳамда эски маълумотларни ижтимоий тармоқларга жойлаб, ёлғон шов-шувларни тарқатмаслик сўралган бошқарма баёнотида.

Шунингдек, Давлат экология қўмитаси томонидан 2021 йилда жайра, ёввойи тўнғиз ва бўриларни табиатдан овлашга Ўзбекистон овчи ва балиқчилар спорт бирлашмаси ҳамда Давлат қўриқхоналари миллий табиат боғлари ва овчилик бошқармасига квота ажратилган.

Фуқаро А.М.га Давлат экология қўмитаси томонидан 2021 йил учун ёввойи ҳайвонларни овлашга квота ажратилмаган ҳамда ёввойи ҳайвонларни табиатдан овлашга рухсатнома расмийлаштирилмаган.