Германиянинг Леверкузен шаҳрида кимё заводида юз берган портлашдан кейин бедарак йўқолган беш нафар одам расман ҳалок бўлган деб топилди. Бу ҳақда Chempark саноат зонасининг Currenta компанияси директори Фрэнк Хилдмар 28 июлда ўтказилган матбуот анжуманида маълум қилган, деб ёзмоқда «Korrespondent.net».
Шу тариқа заводда содир бўлган портлаш ҳамда ёнғин оқибатида ҳалок бўлганлар сони 7 нафарга етди.
«Афсуски, вазиятга тўғри баҳо бериб, беш нафар бедарак йўқолган одамларни энди тирик топа олмаслигимизни тушунишимиз керак», – деган Хилдмар.
У йўқолганларнинг 4 нафари Currenta, яна бир киши эса бошқа бир фирма ходими бўлганини қўшимча қилган. Хилдмар уларнинг яқинларига ҳамдардлик билдириб, беш нафар кишининг энди тирик топилишига умид йўқлигини айтган.
Айни вақтда портлашдан кейин шаҳардаги ҳавонинг зарарланганлик даражаси текширилмоқда, чиқиндиларнинг инсон саломатлигига зиён етказадиган даражада ҳавода тарқалмагани аниқланган.
Currenta бошқарувининг бошқа бир вакили Ҳанс Ҳеннен портлаб кетган цистернада нима модда бўлгани аниқлангани, бироқ ҳодисага нима сабаб бўлгани ҳақида гапиришга ҳали эрта эканини билдирган.
«Албатта цистерна ичида нима бўлганини яхши биламиз, бироқ унинг ичида қандай модда бўлгани билан, ҳодисага нима сабаб эканини аниқлаш ўртасида кескин фарқ мавжуд. Фавқулодда вазиятни тафтиш қилаётган идоралар билан доимий равишда алоқада бўлиб турибмиз, воқеалар занжирини тузиб чиқаяпмиз, шу сабабли ҳодисанинг тахминий сабабини олдиндан айтоқчи эмасман, биз фақат цистерна ичида нима бўлганини биламиз», – дея цистернада нима бўлганини мавҳум қолдирган Ҳеннен.
Унинг сўзларига кўра зарарнинг аниқ миқдори маълум эмас, воқеа содир бўлган жойда ҳанузгача фавқулодда хизматларнинг вакиллари ишламоқда.
«Ҳаётимда бундай фавқулодда ҳолатни ҳали кўрмаганман, бу жуда кам содир бўладиган ҳодиса», – дея матбуот анжуманида ўз сўзларига якун ясаган Ҳеннен.
Эслатиб ўтамиз, Леверкузендаги Chempark саноат ҳудудидаги портлаш 27 июль куни тонгда кимё саноатининг мамлакатдаги энг катта объектларидан бирида содир бўлган. Портлашнинг аниқ сабаблари ҳали ошкор қилинмаган. Ҳодиса оқибатида ҳалок бўлганлардан ташқари яна 31 киши турли даражада жароҳат олган.
Изоҳ (0)