Тожикистон ҳамиша расмий Кобулни Афғонистондаги қонуний ҳукумат деб билган ва ҳеч қачон «Толибон» вакиллари билан учрашув ёки музокара ўтказмаган. Бу ҳақда Тожикистон ташқи ишлар вазири Сирожиддин Муҳриддин журналистларга айтиб ўтди, деб ёзади Asia-Plus.
ТИВ вазирининг сўзларига кўра, сўнгги пайтларда Афғонистоннинг Тожикистон билан чегарадош ҳудудларида вазият ҳақиқатан ёмонлашди, «аммо Тожикистоннинг ушбу йўналишдаги чегаралари ишончли ҳимояланган».
«Тожикистон россиялик чегарачиларни жанубий чегараларга қайтариш бўйича Россия билан музокаралар олиб бораётгани йўқ. Шунингдек, Афғонистон билан чегарадаги кескинлик туфайли Душанбеда Россия чегарачи-маслаҳатчиларининг сонини кўпайтириш режалаштирилмаяпти», — деди вазир.
Унинг сўзларига кўра, бугунги кунда Тожикистон Афғонистондан келувчи қочқинларнинг қанчасини қабул қилиши мумкинлиги ҳақида аниқ айтиб бўлмайди.
«Мен айрим ҳамкасбларим томонидан республика қабул қилиши мумкин бўлган афғонистонлик қочқинларнинг сони бўйича айтилган фикрларга қўшилмайман. Биз бу масалада коронавирус пандемияси, қочоқлар лагерларининг тайёрлиги, шунингдек, террорчилар қочқинлар ниқоби остида мамлакатимизга кириши мумкинлигига тайёрмизми ёки йўқлиги билан боғлиқ вазиятни ҳисобга олишимиз керак», — дея таъкидлади Муҳриддин.
Аввалроқ Тожикистон Мудофаа вазирлигининг Афғонистон билан чегара яқинида жойлашган ҳарбий полигонларига Тожикистон ҳукумати бугунги кунда, тахминан, 100 минг афғонистонлик қочқинларни қабул қилиб, жойлаштириши мумкинлиги хабар қилинганди.
Республика Фавқулодда вазиятлар қўмитаси раҳбарининг ўринбосари, полковник Имомали Иброҳимзоднинг сўзларига кўра, заруриятга қараб мамлакат Афғонистондан келадиган янада кўпроқ қочқинларни қабул қилиши мумкин. «Биз халқаро ташкилотлар билан республиканинг афғонистонлик қочқинларни қабул қилиш салоҳиятини ўрганиб чиқяпмиз», — деган эди полковник.
Бунгача Тожикистоннинг Жайҳун туманида афғонистонлик қочқинларни вақтинчалик жойлаштириш учун база қуришга махсус жой ажратилгани ҳақида хабар берилган.
Эслатиб ўтамиз, 13—14 июль кунлари Тожикистондаги Тоғли Бадахшон мухтор вилоятининг Мурғоб тумани Қизил-Работ қишлоқ жамоати орқали қирғиз миллатига мансуб 347 нафар Афғонистон фуқароси Тожикистон чегарасини кесиб ўтганди. Кейинроқ уларнинг барчаси, улардан аввалроқ чегарани кесиб ўтган афғон қочқинларининг қолганлари ҳам ўз ватанига қайтган.
Изоҳ (0)