Markaziy saylov komissiyasining 23-iyul, juma kuni bo‘lib o‘tgan navbatdagi yig‘ilishida MSK raisi o‘rinbosari Bahrom Qo‘chqorov prezidentlikka nomzodlarni ro‘yxatga olish tartibi to‘g‘risida ma’lumot berdi. Bu haqda “Daryo” muxbiri xabar qilmoqda.
Foto: Xalqaro press-klub
“Bugungi yig‘ilishda Markaziy saylov komissiyasining qarori bilan alohida saylovni o‘tkazish bo‘yicha taqvim-rejani ham tasdiqlab oldik. To‘g‘ri, Saylov kodeksida moddama-modda yozilganda barcha jarayonlarning muddatlari belgilangan. Lekin u qanday belgilangan? Ya’ni saylovga 70 kun qolganda, 60 kun qolganda, deb ko‘rsatib o‘tilgan.
Endi biz saylov kunini 24-oktabr deb belgilaydigan bo‘lsak, demak, shunga binoan, saylov tadbirlari taqvimdagi qaysi oy, qaysi kunga to‘g‘ri kelishini aniq ko‘rsatib berishimiz lozim. Taqvim-rejada nafaqat Markaziy saylov komissiyasi, balki okrug, uchastka saylov komissiyalari va boshqa davlat tashkilotlari, mahalliy davlat hokimiyati organlari tomonidan bajariladigan tadbirlar ham qamrab olingan. Ushbu taqvim-reja ommaga e’lon qilinadi va u tanishib chiqish uchun ochiq bo‘ladi.
Prezidentlikka nomzodlar qachon ko‘rsatilishi haqida gapiradigan bo‘lsak, qonunda belgilangan muddatlar bo‘yicha saylov o‘tkaziladigan kunga 65 kun qolgandan to 45 kun qolgunga qadar saylovga nomzodlar ko‘rsatilishi kerak va saylov kuniga 35 kun qolgungacha nomzodlarni Markaziy saylov komissiya tomonidan ro‘yxatdan o‘tkazish kerak.
Mana, bugundan, ya’ni 23-iyuldan boshlab siyosiy partiyalar o‘zlarining vakolatli vakillari uchun nomzodlarni va ular to‘g‘risidagi ma’lumotlarni Markaziy saylov komissiyasiga taqdim etishlari lozim”, — dedi MSK raisi o‘rinbosari.
