Tokio—2020 Olimpiadasi finaliga chiqqan o‘zbekistonlik taekvondochi Ulug‘bek Rashidovning hal qiluvchi bahsdagi raqibi nomi ma’lum bo‘ldi.
19 yoshli Rashidov finalda Buyuk Britaniya vakili Bredli Sindenga qarshi dayanga chiqadi. Final 25-iyul kuni Toshkent vaqtni bilan taxminan 17:45 da boshlanadi.
Avvalroq Rashidov yarim finalda Bosniya va Gersegovina vakili Nedzad Hushichni 28:5 hisobida yengib, O‘zbekiston uchun dastlabki medalni naqd qilgandi. Sinden esa yarim finalda xitoylik Shuai Jaoni 33:25 hisobida yengdi.
Sinden o‘z yurishini 1/8 finaldan boshladi va unda Yangi Zelandiya vakili Tom Byornsga imkon qoldirmadi (53:8). Chorak finalda esa britaniyalik sportchi turkiyalik Xoqon Rechberni 39:19 hisobida taslim etdi.
Rashidov 1/16 finalda malilik Seydu Mofanani 38:17 hisobida mag‘lub etdi. O‘zbekistonlik sportchi chorak final yo‘llanmasi uchun jangda 3 karra jahon chempioni, Olimpiya o‘yinlarining 2 karra sovrindori, ushbu vazn toifasining birinchi raqamli sportchisi janubiy koreyalik Li De Hun bilan asosiy vaqtda 19:19 hisobida qayd etdi. Bahs taqdirini hal qilgan “Oltin zarba”da Rashidov 2 ochko qo‘lga kiritib, chorak finalga yo‘l oldi. Rashidov 1/4 finalda eronlik Mirhoshim Hussainini 34:22 hisobida yengdi.
Ma’lumot uchun, Rashidovning finaldagi raqibi Bredli Sinden -68 kg vazn toifasida amaldagi Jahon chempioni hisoblanadi. U 2019-yilda Manchester shahrida o‘tkazilgan musobaqada g‘oliblikni qo‘lga kiritgandi. Sinden shuningdek, ushbu vazn toifasining ikkinchi raqamli vakili hisoblanadi.
Izoh (0)