Токио—2020 Олимпиадаси финалига чиққан ўзбекистонлик таэквондочи Улуғбек Рашидовнинг ҳал қилувчи баҳсдаги рақиби номи маълум бўлди.
19 ёшли Рашидов финалда Буюк Британия вакили Бредли Синденга қарши даянга чиқади. Финал 25 июль куни Тошкент вақтни билан тахминан 17:45 да бошланади.
Аввалроқ Рашидов ярим финалда Босния ва Герцеговина вакили Недзад Ҳушични 28:5 ҳисобида енгиб, Ўзбекистон учун дастлабки медални нақд қилганди. Синден эса ярим финалда хитойлик Шуаи Жаони 33:25 ҳисобида енгди.
Синден ўз юришини 1/8 финалдан бошлади ва унда Янги Зеландия вакили Том Бёрнсга имкон қолдирмади (53:8). Чорак финалда эса британиялик спортчи туркиялик Хоқон Речберни 39:19 ҳисобида таслим этди.
Рашидов 1/16 финалда малилик Сейду Мофанани 38:17 ҳисобида мағлуб этди. Ўзбекистонлик спортчи чорак финал йўлланмаси учун жангда 3 карра жаҳон чемпиони, Олимпия ўйинларининг 2 карра совриндори, ушбу вазн тоифасининг биринчи рақамли спортчиси жанубий кореялик Ли Де Ҳун билан асосий вақтда 19:19 ҳисобида қайд этди. Баҳс тақдирини ҳал қилган «Олтин зарба»да Рашидов 2 очко қўлга киритиб, чорак финалга йўл олди. Рашидов 1/4 финалда эронлик Мирҳошим Ҳуссаинини 34:22 ҳисобида енгди.
Маълумот учун, Рашидовнинг финалдаги рақиби Бредли Синден -68 кг вазн тоифасида амалдаги Жаҳон чемпиони ҳисобланади. У 2019 йилда Манчестер шаҳрида ўтказилган мусобақада ғолибликни қўлга киритганди. Синден шунингдек, ушбу вазн тоифасининг иккинчи рақамли вакили ҳисобланади.
Изоҳ (0)