Tokio—2020 Olimpiadasining 24-iyul kungi musobaqalari ortda qoldi. O‘zbekiston delegatsiyasining qator a’zolari ushbu kungi bahslarda ishtirok etdi.
O‘q otish
O‘zbekistonlik sportchilar ichida ishtirokni birinchi bo‘lib o‘q otish bo‘yicha terma jamoa vakili Muxtasar Tohirova boshlab berdi. 10 metrdan miltiqdan o‘q otish bo‘yicha Tohirova 622.2 ball to‘plab, 32-natijani qayd etdi va bu yo‘nalish bo‘yicha o‘z yurishini to‘xtatdi. Ushbu sport turida O‘zbekiston sharafini himoya qilayotgan yagona sportchi bo‘lgan Tohirova keyingi urinishni 50 metr masofada uch holatda o‘q otish yo‘nalishi o‘z omadini sinab ko‘radi.
Qilichbozlik
Sablya yo‘nalishida harakat qilgan 19 yoshli o‘zbekistonlik sportchi Sherzod Mamutov ruminiyalik Yulian Teodosiuga qarshi jang olib bordi va 11:15 hisobida imkoniyatni boy berib qo‘ydi. Shpaga yo‘nalishida esa Malika Hakimova xitoylik Yiven Sunga qarshi bahs yuritib, 10:15 hisobida yutqazib qo‘ydi.
Shu tariqa bu ikki sportchi ham Olimpiadadagi yurishini to‘xtatdi. O‘zbekistonlik qilichbozlardan esa Zaynab Dayibekova (sablya yo‘nalishi) keyinroq o‘z omadini sinab ko‘radi.
Boks
Ushbu sport turida o‘zbekistonliklarning ishtirokini Shahnoza Yunusova (-69 kg) boshlab berdi. U 1/16 finalda polshalik Karolina Kosevskaga qarshi ringga ko‘tarildi va 0:5 hisobida mag‘lub bo‘ldi.
Sanjar Tursunov (-91 kg) esa kutilmaganda 1/16 finaldayoq o‘z ishtirokini yakunladi. Jazoirlik Abdulhafid Benshablaga qarshi kechgan qiyin jangda Tursunov 1:4 hisobida mag‘lub bo‘ldi.
Boks bo‘yicha O‘zbekiston vakillaridan ikki ayol va yetti nafar erkak sportchi qoldi. 25-iyul kuni ularning uch nafari ringga ko‘tariladi.
Dzyudo
Dzyudo ham O‘zbekiston uchun omadli boshlanmadi. Sharofiddin Lutfullayev (-60 kg) 1/8 finalda ukrainalik Artyom Lesiukka qarshi kurash olib bordi va imkoniyatni boy berdi.
Akademik eshkak eshish
Sobir Safaraliyev va Shahboz Xolmirzayev juftligi 2000 metrlik masofani bosib o‘tish uchun 6 daqiqa-yu 44.98 soniya vaqt sarfladi va 4-o‘rinni egalladi. Endilikda ular 25iyul kuni o‘tish musobaqasida ishtirok etadi.
Tennis
O‘zbekistonning birinchi raqamli raketkachisi Denis Istomin dastlabki bosqichda hindistonlik Sumit Nagalga qarshi kortga chiqdi. Uch set natijasiga ko‘ra Istomin mag‘lubiyatni tan oldi — 4:6, 7:6, 4:6.
Velosport
Murodjon Xolmurodov 234 kilometr masofada o‘tkazilgan guruh poygasida 128 nafar poygachi orasida 64-bo‘lib marraga yetib kelgan. Qayd etish kerak ishtirokchilarning 85 nafari finish chizig‘iga qadar yetib kelgan, 43 sportchi esa poygani muddatidan avval to‘xtatgan. Shu bilan Xolmurodov Olimpiya o‘yinlaridagi ishtirokini yakunladi.
Sport gimnastikasi
Rasuljon Abdurahimov ko‘pkurash bahslarida saralash bosqichida ishtirok etdi va olti xil mashqlarda umumiy hisobda 79.064 ochko jamg‘arib, 49-o‘rinda qayd etildi. Biroq bu final yo‘llanmasi uchun yetarli bo‘lmadi.
Shu tariqa 24-iyul kungi musobaqalardan keyin O‘zbekiston vakillarining 9 nafari o‘z yurishini yakunladi. Faqat Shahboz Xolmirzayev / Sobir Safaraliyev juftligi esa (akademik eshkak eshish) medallar uchun imkoniyatni saqlab qoldi. 25-iyul kuni O‘zbekiston vakillari yana 10 ta yo‘nalishda o‘z chiqishini amalga oshiradi.
Izoh (0)