Manchesterga qaytgan Sancho, Parijni makon tutgan Ramos va Hakimi, Kataloniya tomon yuzlangan Aguero hamda Depay. Yozning eng katta va qaynoq transferlari haqida

2021-yil yozining eng qimmat transferlari

• “Manchester Yunayted” anchadan buyon “Dortmund”dan Jeydon Sanchoni sotib olish uchun harakat qilayotgan edi. O‘tgan yilgi muzokaralar salbiy yakunlangandi. Endi esa yarim himoyachi Manchesterga qaytdi. To‘g‘ri, bir paytlar Germaniyaga ketish uchun tark etgan jamoasi “Manchester Siti”ga emas, uning qo‘shnisi “Manchester Yunayted” safiga.

73 million funt (85 million yevro) — bu summa ba’zi shartlar bajarilsa, yana 5 millionga oshishi mumkin (qanday shartlar ekanligi noma’lum, lekin Guardian’ning yozishicha, ularni bajarish qiyin bo‘ladi).

• “Inter” moliyaviy muammolar tufayli Ashraf Hakimini sotdi (jamoa ustozi Antoni Konte ham shu sabab tufayli jamoani tark etgandi): yo uni, yo Lukakuni sotish kerak edi.

• “Bavariya” Yulian Nagelsmanndan (bosh murabbiy) so‘ng 2021-yil fevralidayoq Dayo Upamekano transferini e’lon qilgandi. Lekin Dayo 1-iyuldan jamoaga kelib qo‘shildi.

• “Liverpul” butun mavsum davomida markaziy himoya chizig‘idagi muammolardan aziyat chekdi, shuning uchun 22 yoshli Ibraima Konate xarid qilindi. U esa o‘z raqamini alanga va feyerverklar orqali noan’anaviy tarzda namoyish etdi.

• Emiliano Buendia ikki mavsum ilgari “Norvich”ning APLdagi ko‘zga ko‘ringan futbolchilaridan biri edi, ammo klub quyi divizionga tushib ketdi. Argentinalik futbolchi qolishga qaror qildi va Tyeemu Pukki ikkalasi bir mavsumdan so‘ng jamoani elitaga qaytardi. Buendia gol+pas tizimida 31 ochko jamg‘ardi. Futbolchiga “Aston Villa” va “Arsenal” anchadan buyon qiziqish bildirayotgandi. Kutilmaganda Emiliano “Aston Villa”larni tanladi.

• Rodrigo De Paul bu ro‘yxatda 25 yoshdan katta (27) yagona futbolchi. O‘tgan mavsumda “Udineze” sardori jamoasi gollarining deyarli yarmida ishtirok etdi (42 tadan 18 ta). Yaqinda Messi bilan birga Amerika Kubogi sovrinini ham qo‘lga kiritdi. “Atletiko”, “Liverpul” va “Yuventus” kabi grand jamoalar futbolchini o‘z safiga qo‘shib olish uchun harakat qildi. De Paul esa Diyego Simeone jamoasini tanladi.

• Petson Daka bahordayoq top-jamoalar e’tiborini tortgandi. Futbolchi ushbu mavsumda Avstriya Bundesligasini “portlatdi”: 28 o‘yinda 27 ta gol urib, katta farq bilan chempionat to‘purariga aylandi. Aprel oyida esa 8 daqiqa ichida het-trikka erishgandi. Yangi mavsumdan esa “Lester” safida javlon urishi kutilmoqda.

• Juda kuchli raqobat tufayli “Chelsi”da Fikayo Tomoriga imkon berilmadi. Shuning uchun u “Milan”ga ijaraga berildi. Fikayo o‘ziga notanish bo‘lgan chempionatga tashrif buyurdi va darhol jamoa sardori Alessio Romanyolini zaxiraga mixlab qo‘ydi. Yarim yil ichida milanliklarning asosiy markaziy himoyachisiga aylanib oldi. “Milan” uni sotib olishga qaror qildi.

• Jerson Santos 2016/17-yilgi mavsumda “Roma”da o‘ynagan edi, ammo braziliyalik futbolchi 64 o‘yinda 3 ta gol urganidan so‘ng vataniga qaytib ketishga majbur bo‘lgandi. Unda Yevropada to‘p surish uchun ikkinchi imkoniyat paydo bo‘lyapti — bu safar Fransiyada. Braziliyalik futbolchiga “Marsel”dan tashqari “Chelsi” va “Tottenhem” qiziqish bildirgandi.

• 8 yoshidan buyon “Chelsi” tizimida ta’lim olib kelgan markaziy himoyachi Mark Gei asosiy jamoa uchun ikki marta Liga Kubogi musobaqasida maydonga tushgan. “Suonsi”dagi muvaffaqiyatli ijaradan so‘ng Mark Angliyaga murabbiy sifatida Patrik Viyeyraning “Krestal Pelas”dagi ilk transferiga aylandi.

• Andre Silva o‘tgan mavsum 32 o‘yinda 28 ta gol urib, Levandovskidan keyin Bundesliganing ikkinchi to‘purariga aylandi. U to‘p suradigan “Ayntraxt”ning Chempionlar Ligasiga yo‘llanma olishiga oz qoldi. “Manchester Yunayted”, “Atletiko”, “Real”, “Barselona”, “Manchester Siti” kabi jamoalar futbolchini xarid qilish uchun kurash olib borayotgan edi. Ammo Silva Bundesligani tark etishni xohlamadi va “Leypsig”ga o‘tishga qaror qildi.

Yozning eng yaxshi bepul transferlari

• “Bavariya”dagi 11 yillik faoliyatidan so‘ng David Alaba Myunxenni tark etdi. David erkin agent sifatida “Real”ga o‘tdi va Serxio Ramosning 4-raqamiga ega chiqdi.

• Yozning eng jarangdor transferlaridan biri — niderlandiyalik Memfis Depayning “Barselona” safiga o‘tishi bo‘ldi. Futbolchi Yevro—2020 da 2 ta gol urdi va o‘tgan mavsum Fransiya chempionatida gol+pas tizimida 32 ochko jamg‘ardi.

• Yana bir niderlandiyalik futbolchi Jorjinyo Veynaldum “Liverpul”dan erkin agent sifatida ketdi. Ancha payt “Barselona” bilan aloqada bo‘lib, so‘nggi pallada Parijga yo‘l oldi. Futbolchining so‘zlariga qaraganda, “PSJ”ning loyihasi uni qiziqtirgan.

• Eng kutilmagan transferlardan biri Xoqon Chalxono‘g‘luning “Inter”ga o‘tishi bo‘ldi. “Milan” bilan shartnomasi yakuniga yetgan futbolchi “nerazurrilar”ni tanladi. “Inter” va “Milan” o‘rtasidagi transferlar allaqachon odatiy holga aylangan bo‘lsa-da, bu hodisa baribir muxlislarni g‘azablantiradi.

• Serxio Agueroning “Barsa”ga o‘tishi barcha uchun kutilmagan jumboqqa aylandi. 33 yoshli futbolchi kataloniyaliklarga nega kerak edi? Serxioning Messi bilan do‘stligi bu yerda katta rol o‘ynagan bo‘lishi mumkin. Klubga qaytgan eski-yangi prezident Xoan Laporta Leoni jamoada olib qolish uchun qo‘lidan kelgan hamma narsani qilyapti.

• “Barselona” uchun eng foydali transfer — 19 yoshli Erik Garsiya bo‘ldi. Futbolchi “Manchester Siti”da ikki mavsum davomida 19 ta o‘yinda ishtirok etgan bo‘lishiga qaramasdan, “Barselona” himoyasi uchun aniq asqatadi. Shartnomaga ko‘ra, Garsiyani sotib olmoqchi bo‘lgan jamoa “Barselona”ga 400 million yevro to‘lashi kerak bo‘ladi.

• 35 yoshli Serxio Ramosning “Real”dan ketishi — muxlislar uchun qayg‘uli hodisa bo‘ldi. Sardor Madridda 15 yilini o‘tkazdi va La Ligada XXI asrda o‘ynagan himoyachilar ichida to‘purarga aylandi. Serxio yangi shartnoma ikki yillik bo‘lishini xohlagan edi, Florentino Peres esa bir yillik shartnoma taklif qildi. Shu tariqa Ramos rahbariyat bilan kelisha olmadi va jamoani tark etdi. “PSJ” unga o‘zi istagan sharoitni yaratib bermoqda.