O‘zbekistonlik tennischilar Temur Ismoilov va Amal Sultonbekov kelishilgan o‘yinlarda ishtirok etgani sabab jazolandi.
Bu haqida Tennisda halollikni ta’minlash xalqaro agentligi (ITIA) xabar berdi. Ushbu qaror xalqaro agentlik 2019-yildagi kelishilgan o‘yinlar bo‘yicha tekshiruv o‘tkazganidan so‘ng qabul qilingan.
Dastlabki tekshiruvlardan so‘ng Temur Ismoilov 7 yillik diskvalifikatsiyaga uchragani ma’lum qilingandi. Navbatdagi tekshiruvlardan keyin uni butun umrga tennisdan chetlatish borasida qarorga kelingan. Xalqaro agentlik qo‘ygan taqiq 2021-yil 21-iyuldan kuchga kirgan. Shuningdek, Temur Ismoilov 14 ming dollar miqdorida jarima ham to‘lashi lozim. Amal Sultonbekov esa 5 yilga tennis bahslaridan chetlatilgan va 8 ming dollar miqdoridagi jarimaga tortilgan.
Qayd etish joiz, Professional tennischilar assotsiatsiyasi (ATP) reytingida Ismoilov 397-o‘rinni, Sultonbekov esa 1886-o‘rinni band etib turgandi.
“Gazeta.uz”ning yozishicha, mazkur ish Korrupsiyaga qarshi kurashish bo‘yicha eshitish ofitseri Jeni Subliyer tomonidan olib borilgan. Sanksiyalar sportchilarga boshqaruv organlari tomonidan ro‘yxatga olingan yoki o‘tkaziladigan har qanday tennis musobaqalarida o‘ynash yoki qatnashish taqiqlanishini anglatadi. Ikkala tennischi ham Tennisning Korrupsiyaga qarshi dasturi (TACP) qoidalarining uchta bandini buzganlikda aybdor deb topilgan.
Ma’lumotga ko‘ra, qoidabuzarliklar orasida biror kishini o‘yin natijasiga ta’sir o‘tkazishga undash, o‘yin natijasiga ta’sir o‘tkazishga rozi bo‘lish, o‘yin natijasiga ta’sir o‘tkazish uchun pul yoki boshqa foyda olish kabi holatlar bor. Bundan tashqari, Ismoilov o‘yinchini biror bir tadbirda o‘zining bor kuchini namoyish qilmaslikka undaganlikda ham aybdor deb topilgan.
Eslatib o‘tamiz, avvalroq O‘FA hakami Olim To‘ychiboyev bir qator futbol o‘yinlarida uchrashuvga yoki uning natijasiga ta’sir o‘tkazish maqsadida kelishuvlarda qatnashgani uchun bir yil muddatga futbol bilan bog‘liq har qanday faoliyatdan chetlatilgani, sambo bo‘yicha og‘ir vazn toifasida harakat qiluvchi o‘zbekistonlik Dilshod Choriyev antidoping qoidalarini buzganligi sabab 4 yil sport musobaqalariga qatnasha olmasligi, og‘ir atletika bo‘yicha O‘zbekiston terma jamoasining yetti nafar vakili antidoping qoidalarini buzgani sabab 4 yil muddatga diskvalifikatsiya qilingani haqida xabar berilgandi.
Izoh (0)