Buxoro viloyatining Jondor tumanida uch yildan buyon hamkorlik shartnomasi talablarini buzib kelgan MChJdan xorij kompaniyasi foydasiga 342 million 500 ming so‘m va 20 ming dollar qarzdorlik undirildi. Bu haqda “Daryo”ga MIB viloyat boshqarmasi axborot xizmati rahbari Ilhom Tursunov ma’lum qildi.
Ta’kidlanishicha, Jondor tumanidagi “Tekstil” MChJ va Turkiyaning Setas kimya Sanayi A.S. kompaniyasi o‘rtasida 2019-yilda hamkorlik shartnomasi tuzilgan. Xorij kompaniyasidan bo‘yoq mahsulotlarini qabul qilib olgan tadbirkor pul mablag‘larini kelishilgan vaqtda o‘tkazib bermagan. Shu sabab xorijiy korxona MChJni sudga bergan.2021-yilning mart oyida Toshkent shahar iqtisodiy sudida ko‘rib chiqilgan mazkur masala Setas kimya Sanayi A.S. kompaniyasi foydasiga hal etilgan va MChJ hisobidan kompaniyaga 1 milliard 5 million 200 ming so‘m qarz undirilishi belgilangan. Jamiyat ushbu ijro hujjati talablarini ham bajarmagan. Shundan so‘ng byuroning Jondor tuman bo‘limi tomonidan majburiy ijro harakatlari olib borilib, “Tekstil” MChJdan 342 million 500 ming so‘m va 20 ming dollar majburiy tartibda undirilgan.
Jamiyatga tegishli mol-mulklarni qidirish natijasiga ko‘ra, qarzdorga tegishli bo‘lgan Midibus va Cobalt rusumli avtomashinalar ham dalolatnoma asosida xatlangan. Ayni paytda ushbu avtomashinalarni baholash hamda elektron savdo maydonchasiga sotuvga chiqarish ishlari olib borilmoqda.
Izoh (0)