Бухоро вилоятининг Жондор туманида уч йилдан буён ҳамкорлик шартномаси талабларини бузиб келган МЧЖдан хориж компанияси фойдасига 342 миллион 500 минг сўм ва 20 минг доллар қарздорлик ундирилди. Бу ҳақда «Дарё»га МИБ вилоят бошқармаси ахборот хизмати раҳбари Илҳом Турсунов маълум қилди.
Таъкидланишича, Жондор туманидаги «Текстиль» МЧЖ ва Туркиянинг Setas kimya Sanayi A.S. компанияси ўртасида 2019 йилда ҳамкорлик шартномаси тузилган. Хориж компаниясидан бўёқ маҳсулотларини қабул қилиб олган тадбиркор пул маблағларини келишилган вақтда ўтказиб бермаган. Шу сабаб хорижий корхона МЧЖни судга берган.2021 йилнинг март ойида Тошкент шаҳар иқтисодий судида кўриб чиқилган мазкур масала Setas kimya Sanayi A.S. компанияси фойдасига ҳал этилган ва МЧЖ ҳисобидан компанияга 1 миллиард 5 миллион 200 минг сўм қарз ундирилиши белгиланган. Жамият ушбу ижро ҳужжати талабларини ҳам бажармаган. Шундан сўнг бюронинг Жондор туман бўлими томонидан мажбурий ижро ҳаракатлари олиб борилиб, «Текстиль» МЧЖдан 342 миллион 500 минг сўм ва 20 минг доллар мажбурий тартибда ундирилган.
Жамиятга тегишли мол-мулкларни қидириш натижасига кўра, қарздорга тегишли бўлган Midibus ва Cobalt русумли автомашиналар ҳам далолатнома асосида хатланган. Айни пайтда ушбу автомашиналарни баҳолаш ҳамда электрон савдо майдончасига сотувга чиқариш ишлари олиб борилмоқда.
Изоҳ (0)