Toshkentning Chilonzor tumanida joylashgan “Atlas” mebel markazida koronavirusga qarshi kurash doirasida navbatdagi taqsimlash markazi tashkil etildi. Poytaxt hokimi Jahongir Ortiqxo‘jayev ushbu markazga tashrif buyurib, bemorlarga yaratilgan sharoitlar bilan tanishdi.
Toshkent hokimligi matbuot xizmati tomonidan e’lon qilingan videolavhadan ko‘rish mumkinki, Jahongir Ortiqxo‘jayev koronavirusga chalinganlarni davolashga mo‘ljallangan markazdagi bemorlarga yaratilgan sharoitlar bilan tanishgan. Tashrif davomida poytaxt hokimi reanimatsiyani, yaratilgan dori zaxiralarni ko‘zdan kechirgan. Bemorlar bilan suhbatlashib, ularning ahvoli bilan qiziqqan.
Markazdan chiqqan Jahongir Ortiqxo‘jayev shifokorlar bilan gaplashgan, bemorlarning aksariyati koronavirusga qarshi emlanmagan fuqarolari ekani, vaksinatsiyadan o‘tganlar kasallikni oson yengib o‘tayotgani ta’kidlangan.
“Bu ketishda bo‘lsa, ertaga odamlarga joy ham qolmaydi. Odamlar vaksinatsiyadan tezda o‘tishi kerak… Tezroq vaksinatsiya qilib, odamlarga tushuntirmasak, shifokorlar ham charchayapti. Ertaga shifokorlarni ham yetkaza olmay qolamiz”, — deya ta’kidlagan Toshkent hokimi.
Avvalroq Toshkent shahrida DXX tasarrufidagi “Yoshlik” sport majmuasida, IIV tasarrufidagi “Universal” sport majmuasida 700 koyka-o‘ringa mo‘ljallangan kovid-markaz, “O‘zekspomarkaz”da 750 o‘rinli koronavirusga chalingan bemorlarni davolashga ixtisoslashgan markaz qaytadan tashkil etilgani to‘g‘risida xabar berilgandi. Shuningdek, Samarqandda 1000 o‘rinli, Namanganda 400 o‘rinli saralash va taqsimlash markazi o‘z faoliyatini qayta boshladi.
Eslatib o‘tamiz, 2020-yil noyabr oyining oxirlarida “Atlas” va “Yoshlik” koronavirusga ixtisoslashgan markazlari, 2020-yil 9-dekabr kuni esa “O‘zekspomarkaz”dagi kovid-markaz yopilgandi. O‘shanda kasallik dinamikasi oshganda yopilgan obyektlar tezkor ravishda qayta ochilishi ma’lum qilingandi.
Izoh (0)