Respublika maxsus komissiyasi qaroriga ko‘ra, koronavirusga qarshi kurashishda aholiga qulaylik yaratish maqsadida ochilgan “Atlas”, “Yoshlik” markazlari vaqtinchalik yopildi. Kasallik dinamikasi oshganda yopilgan obyektlar qayta tezkor ravishda ochiladi. Bu haqda AOKA huzurida o‘tgan brifingda Koronavirusga qarshi kurashish shtabi a’zosi Sevara Ubaydullayeva ma’lum qildi.
Ma’lum qilinishicha, taqsimlash markazlarining yopilish sabablaridan biri koronavirusga chalingan bemorlar soni kamaygani bilan bog‘liq.
“Toshkent shahrida taqsimlash markazlarining yopilishi, poytaxtda, umuman mamlakatda epidemiologik vaziyat barqarorlashganini anglatadi.
To‘g‘ri, ko‘plab mamlakatlarda koronavirus keng tarqalmoqda, ko‘plab davlatlar ikkinchi to‘lqindan aziyat chekmoqda. Bu bizni hushyorlikka chaqirishi lozim. Shunga ko‘ra, bugungi kunda davlat va barcha manfaatdor vazirlik, idoralar epidemiologik vaziyatni nazorat qilish bo‘yicha ishlar olib borishmoqda va kasallik dinamikasi oshganda yopilgan obyektlar qayta tezkor ravishda ochiladi.
Bundan tashqari, mamlakat shifokorlari va olimlari pandemiya davrida koronavirusga chalingan bemorlarni samarali davolash bo‘yicha katta tajriba orttirishdi, shuningdek, kasbiy mahoratlarini ham oshirdi.
Shuningdek, koronavirus bemorlarini davolashga ixtisoslashgan barcha mavjud markazlar zarur yotoq-o‘rinlari, tibbiyot uskunalari va dori vositalari bilan ta’minlangan, shuningdek, malakali tibbiyot xodimlari ham biriktirilgan. Markazlar yopilgan taqdirda ham ushbu ta’minotlar saqlab qolinadi. Takroriy to‘lqinda ushbu markazlar va resurslar aholiga qayta yuqori malakali yordam ko‘rsatish uchun tiklanadi”, — deydi mutaxassis.
Avvalroq Samarqandning Kattaqo‘rg‘on shahri va Urgut tumanidagi COVID-markazlar ham yopilgani haqida xabar berilgandi.
Eslatib o‘tamiz, Prezident Shavkat Mirziyoyev raisligida 17-noyabr kuni bo‘lib o‘tgan videoselektorda O‘zbekiston bo‘yicha 89 ta muassasada 17 500 ta o‘rin COVID-19 bilan kasallanganlar uchun ajratilgani hamda ushbu o‘rinlarda 6570 nafar bemor davolanayotgani va koykalar bandligi respublika bo‘yicha esa 38 foizni tashkil etishi ma’lum qilingandi. Shu munosabat bilan, mutasaddilarga koronavirusga ixtisoslashgan shifoxonalar faoliyatini chuqur o‘rganib, ularni optimizatsiya qilish topshirig‘i berilgandi.
Toshkent shahar Uchtepa tumanida joylashgan “Atlas” savdo majmuasi binosida 1000 o‘ringa mo‘ljallangan koronavirusga chalingan va gumon qilingan bemorlarni qabul qilish va taqsimlash markazi sentabr oyining oxirida ishga tushirilgandi.
Toshkent shahar Shayxontohur tumanidagi “Yoshlik” sport majmuasi iyul oyining oxirida koronavirus tashxisi qo‘yilgan bemorlarni davolash uchun 520 o‘rinli maxsus markazga aylantirilgandi.