Bosh prokuratura huzuridagi departamentning Sirdaryo viloyat boshqarmasi tomonidan o‘tkazilgan tezkor tadbirda fuqaroni o‘qishga kiritib qo‘yish evaziga 4,5 ming dollar olgan shaxs ushlandi.
Ma’lum qilinishicha, X.J. ismli shaxs boshqa bir fuqaroni O‘zbekiston Davlat jismoniy tarbiya universitetiga yuqori lavozimda ishlovchi tanishi orqali o‘qishga kiritib qo‘yish evaziga 4,5 ming dollarni firibgarlik yo‘li bilan olgan vaqtida ashyoviy dalillar bilan qo‘lga olingan.
Shuningdek, departament va DXXning Toshkent viloyat boshqarmalari xodimlari tomonidan o‘tkazilgan tezkor tadbirda fuqaro F.Yo. boshqa bir fuqaroni o‘zining vakolatli tashkilotlarda ishlovchi tanishlari orqali Qozog‘istondagi oliy ta’lim muassasasiga o‘qishga kiritib qo‘yishni va’da qilgani aniqlangan. Shuningdek, u Qozog‘istondagi o‘qishni 2-kursdan O‘zbekistondagi oliygohga ko‘chirib berishi evaziga fuqaro Sh.X.dan firibgarlik yo‘li bilan 5,8 ming dollarini olgan vaqtida ashyoviy dalillar bilan ushlangan.
Bundan tashqari, departament va DXXning Farg‘ona viloyat boshqarmalari tomonidan tezkor tadbir o‘tkazilgan. Tadbirda Farg‘ona Davlat universitetining X.M. va Sh.T. ismli talabalari oldindan til biriktirib, yuqori lavozimda ishlovchi tanishlari orqali fuqaro M.B.ni o‘qishini xorij universitetidan Farg‘ona Davlat universitetiga ko‘chirib berishni va’da qilgani aniqlangan. Shuningdek, ular yana ikki nafar fuqaroni Farg‘ona Davlat universitetining sirtqi bo‘limiga o‘qishga kiritib qo‘yish evaziga 10 ming dollarni olgan vaqtida qo‘lga olingan.
Tezkor tadbir davom ettirilib, Farg‘ona shahridagi “S” o‘quv markazi o‘qituvchisi E.A. fuqaro M.B.ni o‘qishini xorij universitetidan ko‘chirib berish hamda ikki nafar fuqaroni o‘qishga kiritib qo‘yishni va’da qilib, evaziga talab qilgan 8 ming AQSh dollarini olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Toshkentda fuqaroning xorijdagi o‘qishini “ToshMI”ga ko‘chirib berish evaziga 6 ming dollar olgan shaxs ushlangani, Navoiy davlat pedagogika institutiga o‘qishga kiritib qo‘yishni va’da qilib, fuqarodan 2 ming dollar olgan shaxs qo‘lga olingani, Jizzaxda 18 ming dollar evaziga ikki fuqaroni xorij universitetiga o‘qishga kiritib qo‘yishni va’da qilgan shaxslar ushlangani to‘g‘risida xabar berilgandi.
Izoh (0)