Тошкентнинг Чилонзор туманида жойлашган «Атлас» мебель марказида коронавирусга қарши кураш доирасида навбатдаги тақсимлаш маркази ташкил этилди. Пойтахт ҳокими Жаҳонгир Ортиқхўжаев ушбу марказга ташриф буюриб, беморларга яратилган шароитлар билан танишди.
Тошкент ҳокимлиги матбуот хизмати томонидан эълон қилинган видеолавҳадан кўриш мумкинки, Жаҳонгир Ортиқхўжаев коронавирусга чалинганларни даволашга мўлжалланган марказдаги беморларга яратилган шароитлар билан танишган. Ташриф давомида пойтахт ҳокими реанимацияни, яратилган дори захираларни кўздан кечирган. Беморлар билан суҳбатлашиб, уларнинг аҳволи билан қизиққан.
Марказдан чиққан Жаҳонгир Ортиқхўжаев шифокорлар билан гаплашган, беморларнинг аксарияти коронавирусга қарши эмланмаган фуқаролари экани, вакцинациядан ўтганлар касалликни осон енгиб ўтаётгани таъкидланган.
«Бу кетишда бўлса, эртага одамларга жой ҳам қолмайди. Одамлар вакцинациядан тезда ўтиши керак… Тезроқ вакцинация қилиб, одамларга тушунтирмасак, шифокорлар ҳам чарчаяпти. Эртага шифокорларни ҳам етказа олмай қоламиз», — дея таъкидлаган Тошкент ҳокими.
Аввалроқ Тошкент шаҳрида ДХХ тасарруфидаги «Ёшлик» спорт мажмуасида, ИИВ тасарруфидаги «Универсал» спорт мажмуасида 700 койка-ўринга мўлжалланган ковид-марказ, «Ўзэкспомарказ»да 750 ўринли коронавирусга чалинган беморларни даволашга ихтисослашган марказ қайтадан ташкил этилгани тўғрисида хабар берилганди. Шунингдек, Самарқандда 1000 ўринли, Наманганда 400 ўринли саралаш ва тақсимлаш маркази ўз фаолиятини қайта бошлади.
Мавзуга доир: Тошкентда яна 100 ва 300 ўринли ковид-марказлар очилади
Изоҳ (0)