Qirg‘iziston afg‘onistonlik qirg‘izlarni qabul qilishga tayyor va ushbu masalada Birlashgan Millatlar Tashkiloti hamda Tojikistondan yordam so‘raydi. Bu haqda Qirg‘iziston Tashqi ishlar vazirligi matbuot xizmatiga tayanib, Asia-Plus xabar berdi.
“Qirg‘iziston Respublikasi Tashqi ishlar vazirligi BMTning Markaziy Osiyodagi qochqinlar ishi bo‘yicha Oliy komissarligi boshqarmasining Mintaqaviy idorasiga va uning Qirg‘izistondagi byurosiga Tojikiston Respublikasida vaqtincha bo‘lib turgan afg‘onistonlik qirg‘izlar bilan bog‘liq vaziyat yuzasidan murojaat qildi hamda ularni Tojikistondan Qirg‘izistonga evakuatsiya qilishni tashkil qilishda yordam so‘radi”, — deyiladi matbuot xizmati xabarida.
Shuningdek, Qirg‘iziston TIV Tojikiston TIVga afg‘onistonlik qirg‘izlarning qirg‘iz-tojik davlat chegarasidagi nazorat-o‘tkazish punktlarigacha qarshiliksiz yetib olishida ko‘mak berish to‘g‘risida iltimosnoma yubordi.
“Ayni paytda Qirg‘iziston TIV Tojikiston hukumati va BMT Qochqinlar ishlari bo‘yicha Oliy komissarligi bilan afg‘onistonlik qirg‘izlarni Qirg‘iziston respublikasi hududiga evakuatsiya qilish bo‘yicha ish olib bormoqda. O‘z navbatida, Qirg‘iziston tomoni Tojikiston hukumati respublikaning xalqaro majburiyatlariga muvofiq evakuatsiya masalasini tezkor hal qilish uchun maksimal darajada yordam berishini kutmoqda”, — deya o‘z xabarini yakunlaydi matbuot xizmati.
13—14-iyul kunlari Tojikistondagi Tog‘li Badaxshon muxtor viloyatining Murg‘ob tumani Qizil-Rabot qishloq jamoati orqali qirg‘iz millatiga mansub 347 nafar Afg‘oniston fuqarosi Tojikiston chegarasini kesib o‘tgandi.
Ularning barchasi Afg‘onistonning Badaxshon viloyati, Vaxon tumanidagi Andemin qishlog‘i aholisi. Davlat chegarasini kesib o‘tishda ikki go‘dak vafot etgan. Hozirda qochqinlar Qizil-Rabot qishloq jamoatining Choshtepa va Duyutuk uchastkalariga joylashtirilgan.
Izoh (0)