Germaniyaning Arvayler tumanida (Reynland-Pfals shtatining bir qismi) kuchli suv toshqini natijasida taxminan 1,3 ming kishi bedarak yo‘qolgan deb hisoblanmoqda. Bu haqda tuman ma’muriyati veb-saytiga tayanib, “RBK” xabar berdi.
Tabiiy ofat kamida 80 kishining umriga zomin bo‘lgan. Jumladan Shimoliy Reyn-Vestfaliya federal shtatida kuchli bo‘ron natijasida 30 kishi, Reynland-Pfalsda esa kamida 50 kishi halok bo‘ldi. “Qurbonlar ko‘payishi mumkin degan xavotir bor”, — dedi 16-iyul kuni ertalab Koblenz shahri politsiyasi vakili.
Shuningdek, 3,5 mingga yaqin odam tibbiy muassasalarga yuborilgan. 16-iyul kuni ushbu hududdagi barcha maktablar yopiq bo‘ladi.
Arvaylerda, jumladan, Ar daryosi va uning irmoqlarida qutqaruv ishlari davom etmoqda. Shuningdek, Germaniya g‘arbidagi Shimoliy Reyn —Vestfaliya shtati hamda Baden-Vyurtembergda ham qutqaruv ishlari olib borilmoqda.
Qutqaruv ishlarini tabiiy ofatga qarshi kurash uchun jalb qilingan 1 mingdan ortiq o‘t o‘chiruvchilar, politsiyachilar va bo‘linmalarning boshqa xodimlari amalga oshirmoqda. Hukumat qo‘shimcha yordam, jumladan tibbiy va transport ko‘magi, shuningdek, qo‘shimcha ravishda bundesver kuchlarini jalb qilishni so‘radi.
Hozir tashrif bilan Vashingtonda bo‘lib turgan Germaniya kansleri Angela Merkel, federal hukumat jabrlanganlarga yordam ko‘rsatishiga va’da berdi. U qurbonlarning yaqinlariga hamdardlik bildirdi.
Kanslerning so‘zlariga ko‘ra, fojia ko‘lamini aniqlashga hali erta, bu yaqin kunlarda ma’lum bo‘ladi. Reynland-Pfals bosh vaziri Malu Drayer esa tabiiy ofat oqibatidagi zararni misli ko‘rilmagan deb atagan.
Bir necha kundan beri Germaniyada kuchli yomg‘ir yog‘moqda. 15-iyul oqshomiga qadar Shimoliy Reyn-Vestfaliya va Reynland-Pfalsda kamida 59 kishi halok bo‘lgani ma’lum qilingandi.
Ba’zi shaharlarda hukumat Reyn daryosiga yaqin uylarda yashovchi aholini evakuatsiya qilishni tashkil qildi. Ko‘plab inshootlar suv ostida qolgan, yuz minglab odamlar elektrdan mahrum bo‘lgan.
Avvalroq Rossiya janubida kuchli yomg‘ir tufayli uylar suv ostida qolgani, Qrimdagi Kerch va Yalta shaharlarida suv toshqini tufayli 1,7 mingdan ortiq odam evakuatsiya qilingani haqida xabar berilgandi.
Izoh (0)