Вьетнамда сўнгги ҳафталарда коронавирусга чалиниш ҳолатлари бўйича экспоненциал ўсиш кузатилмоқда. Вьетнам пандемия бошидан то яқин вақтгача касаллик тарқалишига йўл қўймаслик бўйича энг яхши натижаларга эришаётган мамлакатлардан бири эди, деб ёзади Meduza.
Вьетнам коронавирус биринчи бўлиб тарқалган Хитой билан чегарадош, шунинг учун мамлакатда касалликка чалиниш бўйича дастлабки ҳолатлар 2020 йил 23 январда — Европага қараганда анча олдин пайдо бўлган.
Февраль ойида, бутун дунёда касалланиш ҳолатлари ҳали саноқли даражада бўлган пайтда, Вьетнам ҳукумати Хитойдан келувчиларнинг мамлакатга киришини чеклади, пандемия бошланганда эса чегараларни бутунлай ёпиб қўйди. Аксарият мамлакатлар сингари Вьетнам ҳукумати ҳам оммавий тестларга эмас, балки касалланганлар ва чет элдан кириб келганлар билан мулоқотда бўлган одамларни қидириб топиш ҳамда вирус юқтириш хавфи бўлган одамлар учун карантин белгилаш чораларига таянган.
2020 йил апрель ойида мамлакатда 85 мингдан ортиқ одам карантин ҳолатида бўлган, ваҳоланки, ўша пайтда инфекция ҳали саноқли одамларда тасдиқланган эди. Вирус аломатлари бор кишилар билан бир қаторда улар билан алоқада бўлганларнинг ҳаммаси карантин остига олинган.
Бундан ташқари, расмийлар гигиена тадбирларини тарғиб қилиш, ниқоб тақиш ва ижтимоий масофа сақлаш режимига эътибор қаратди.
Ўз вақтида қабул қилинган мазкур чора-тадбирлар Вьетнамга бутун мамлакат бўйлаб карантин жорий қилиш ва вируснинг назоратсиз тарқалишидан йироқ бўлиш имконини берди. Ҳукумат фақат бир нечта маҳаллий локдаунлар билан чекланди.
Натижада 2021 йил мартига келиб — пандемия бошланганидан бир йил ўтгач, 100 миллион аҳоли яшайдиган мамлакатда касалланишнинг бор-йўғи иккита кичик маҳаллий ўчоғи кузатилган, уларда кунига бир неча ўнлаб кишиларда инфекция қайд этилган: қолган вақтларда касалланиш ҳолатлари саноқли бўлган.
Вьетнамда пандемиянинг биринчи йилида жами 2,5 мингга яқин одам COVID-19 юқтириб олди, бир неча ўнлаб беморлар вафот этди.
Мамлакатда касалликнинг кескин ўсиши 2021 йил май ойининг биринчи ярмида бошланди, бир кунда ўнлаб, кейинроқ юзлаб одамларда инфекция қайд этила бошлади. Май ойи охирида расмийларнинг маълум қилишича, коронавируснинг мамлакатда тарқалаётган варианти дельта ва альфа штаммларга ўхшайди —шу сабабли касалликнинг юқиш тезлиги ортмоқда.
Июнь ойи охиридан вирус аҳоли зич жойлашган Ханой ва Хошимин шаҳарларида ёйила бошлагач, касалланиш даражаси экспоненциал тарзда ўса бошлади, инфекция юқтириш ҳолати ҳар олти-етти кунда икки баравар кўпайишни бошлади: 22 июнь куни 252 та ҳолат, 30 июнда – 545 та, 6 июлда – 1029 та, 12 июлда – 2187 та. 14 июль куни эса 2830 кишида касаллик қайд этилиб, рекорд ўрнатилди.
Мамлакатда вирусга қарши курашиш учун аҳолини оммавий тестлардан ўтказиш бошланди. Вьетнамнинг аҳоли зич жойлашган энг йирик шаҳри Хошиминда вирус тез тарқалмоқда. Ҳозир шаҳарда фақат рухсатнома асосида ҳаракатланиш мумкин, кафе ва ресторанлар ёпиқ, улардан овқат етказиб бериш ҳам тақиқланган. Бошқа кўплаб шаҳарларда, жумладан, Ханойда ҳам турли хил даражадаги ҳудудий локдаунлар ўрнатилган.
Вирус тарқалиши билан боғлиқ вазият Вьетнамда эмланганлар сонининг жуда камлиги билан мураккаблашмоқда — аҳолининг 4 фоиздан камроғи коронавирусга қарши вакцинанинг биринчи компонентини олган, 1 фоиздан кам одам тўлиқ эмланган. Вакцинанинг дастлабки партияси (Вьетнамда, асосан AstraZeneca қўлланилади) мамлакатга март ойида етказиб берилди, аммо оммавий вакцинация касаллик ўсиши билан июнь ойининг ўрталарига келиб бошланди. Ҳозир Вьетнамда кунига бир неча юз минг киши эмланмоқда.
Изоҳ (0)