Украина Конституциявий суди (КС) украин тилини давлат тили сифатида таъминлаш тўғрисидаги қонунга мувофиқ барча фуқароларга украин тилини билишни мажбурий этиб қўйди. Ушбу қарор КС расмий веб-сайтида эълон қилинган.
Ҳужжат матнида қайд этилишича, ушбу чоралар Украинанинг бошқа давлатлар, жумладан, Россия империяси ва СССР таркибида узоқ вақт бўлган турли қисмларини ўша давлатлар таъсиридан халос қилиш учун зарур. «Украин тили — қадимий Киев давридан бери ўзининг тарихий давомийлигини сақлаб келаётган Украина давлатчилигининг ажралмас атрибутидир », — дейилади КС баёнотида.
Қайд этилишича, фуқаролар шахсий мулоқот учун ҳар қандай бошқа тилдан фойдаланиш ҳуқуқига эга бўлиб қолади. Суд янги норманинг мазмунида ҳеч қандай дискриминация топмади.
Хабарда айтилишича, «украин тили — бу Украина давлатчилиги ва бирдамлигининг ажралмас шарти (conditio sine qua non)». Украина Конституциявий судининг қарори мажбурий ва якуний бўлиб, шикоятга ўрин йўқ. Қонунни ишлаб чиқиш, қабул қилиш ва амалга оширишда судьялар ҳеч қандай қонунбузарликларни аниқламади.
Украинада мамлакатнинг бешинчи президенти Пётр Порошенко ҳукумати томонидан ишлаб чиқилган «Украин тилининг давлат тили сифатида ишлашини таъминлаш тўғрисида»ги қонун 2019 йил 16 июлда кучга кирганди. Ҳужжатга кўра, украин тили давлат ва маҳаллий ҳокимият органлари, таълим муассасалари, касалхоналар, хизматлар ва оммавий ахборот воситалари учун мажбурий бўлиб қолди.
Амалдаги президент Владимир Зеленский сайловолди ташвиқоти пайтида ушбу қонуннинг айрим бандларини танқид қилган, кейинчалик «Халқ хизматкори» депутатлари ҳам уларни танқид қилган. «Мухолифат платформаси — ҳаёт учун» партиясининг вакиллари Конституциявий суд ёрдамида қонунга қарши чиқишга уринди, аммо 14 июль куни суд ҳужжатнинг барча бандларини асосий қонунга мувофиқ деб тан олди.
Мавзуга доир:
Изоҳ (0)