Буюк Британиянинг The Guardian нашри 2016 йил бошида Россия президенти Владимир Путин Дональд Трампни АҚШдаги президентлик сайловларида қўллаб-қувватлаш мақсадида махсус жосуслик операцияларини ўтказиш ҳақида кўрсатмалар берганини хабар қилди. Нашр бу ҳақда Кремлдаги ахборот сиздирилиши оқибатида ошкор бўлган ҳужжатлар орқали хабар топган.
Британия газетасининг қайд этишича, 2016 йил 22 январь куни Кремлда Россия хавфсизлик кенгашининг мазкур масала муҳокамасига бағишланган муҳим йиғилиши ўтказилган. Унда Путин, юқори лавозимдаги вазирлар, Россия махсус хизматларининг раҳбарлари иштирок этган. Расмий маълумотларга кўра, шу куни ҳақиқатдан ҳам Хавфсизлик кенгашининг мажлиси ўтказилган, аммо тадбирда мамлакат ичидаги масалалар, Молдова ҳамда дунё бозоридаги вазият муҳокама қилинган.
Йиғилиш иштирокчилари Россия президенти бошқарувидаги экспертлар бошқармасининг Москвага қарши АҚШ санкцияларига жавоб ҳаракатлари бўйича ҳисоботини ўрганган. Ҳужжатда Дональд Трамп АҚШ президентлиги учун асосий ва нисбатан муносиб номзод деб ёзилган, барча кучларни сафарбар этиб, уни сайловларда қўллаб-қувватлаш, сайловларда ғалаба қозониши учун ҳаракат қилиш зарурлиги таъкидланган. Шунингдек, мазкур ҳаракатлар АҚШда ижтимоий беқарорликни юзага келтириш ҳамда мазкур мамлакат президентининг музокаралардаги позициясини камайтириш учун амалга оширилиши ниҳоятда муҳим экани қайд этилган.
Ҳисобот муаллифлари Трампга «психик жиҳатдан беқарор, ихтиёрсиз, паст даражадаги комплексга эга мувозанатдан тез чиқувчи, амалда консерватив қарашлар билан чекланадиган шахс» дея тавсиф берган.
The Guardian сиздирилган ҳужжат Кремлда Трамп ҳақида бошқа шахсий маълумотлар бўлганлигини тасдиқлаши ҳақида ёзган. Ҳисоботда Трамп Россияда бўлган вақтларидаги айтим вазиятлар қаламга олинган. Гап қайси ҳодисалар ҳақида кетаётгани мавҳум, тафсилотлар ҳисоботга илова қилинган, бироқ журналистлар бу борадаги маълумотларни қўлга кирита олмаган.
The Guardian ўша вақтда Владимир Путин ҳамда разведка идораларининг бошқа раҳбарлари йиғилиш якунида АҚШ президентлиги сайловларига аралашиш режасини тайёрлаб қўйган деб ҳисобламоқда. Нашр ушбу учрашувдан кейин Россия президенти АҚШга қарши жавоб ҳаракатларини амалга оширадиган комиссия тузиш ҳақида фармонни имзолаганини тахмин қилган. Қайд этилишича, Ғарб махсус хизматлари мазкур ҳужжатлардан хабардор бўлган ва уларни диққат билан ўрганиб чиққан.
Нашр мамлакат ҳарбий разведкаси учун жавобгар — Россия мудофаа вазири Сергей Шойгунинг комиссия раиси бўлганини аниқлаган. Шойгуга бўлинма ва хизматлар ишини мувофиқлаштириш, ахборотни тўплаш ҳамда тизимлаштириш, шунингдек, объектнинг ахборот муҳитига таъсир кўрсатиш тадбирларини (киберҳужумлар экани тахмин қилинган) тайёрлаш бўйича топшириқлар берилган. Ташқи разведка хизмати комиссия учун қўшимча ахборот тўплаши, Федерал хавфсизлик хизмати эса контрразведка ишлари билан шуғулланиши белгиланган. Идораларга бир ҳафта ичида, 2016 йил 1 февралгача сайловлар жараёнига аралашиш юзасидан аниқ таклифлар бериш вазифаси юкланган.
Россия президенти матбуот котиби Дмитрий Песков The Guardian эълон қилган мазкур материалга изоҳ берар экан ушбу мақолага «ажойиб жиноий асар» деб таъриф берди. Журналистлар бу борада Дональд Трампнинг расмий изоҳини олишнинг уддасидан чиқмаган.
Аввал АҚШ ҳукумати Россиянинг 2016 йилдаги сайловларга аралашганлиги бўйича тергов ишларини олиб борган. Ишни ўрганган махсус прокурор Роберт Мюллер Россиянинг сайловлар жараёнига аралашган, лекин Дональд Трамп ва унинг штаби билан келишган ҳолда иш олиб бормаган деган хулосага келган. Россия вакиллари сайловларга аралашув бўлганини инкор қилиб келмоқда.
Изоҳ (0)