Samarqand viloyatining Toyloq tumani “Galabotir” mahallasida yashovchi 1999-yilda tug‘ilgan F.Q. amakivachchasi 2003-yilda tug‘ilgan O.Q.ning ko‘krak qafasiga 10 marotaba pichoq urib, uni qasddan o‘ldirgan. Bu haqda “Daryo”ga viloyat prokuraturasi axborot xizmati ma’lum qildi.
Ta’kidlanishicha, 2021-yilning 4-iyul kuni F.Q. amakivachchasining uyiga mast holda kelib, janjal ko‘targan. Shu sababli qarindoshining turmush o‘rtog‘i X.Sh. unga nisbatan qonuniy chora ko‘rishni so‘rab, tuman IIBga ariza bilan murojaat qilgan.2021-yilning 6-iyul kuni, taxminan, soat 15:20 atrofida F.Q. amakivachchasining o‘g‘li O.Q. bilan ham tortishib qolgan. Oqibatda F.Q. amakivachchasi O.Q.ning ko‘krak qafasiga 10 marotaba pichoq urib, qasddan o‘ldirgan.
Toyloq tuman sud-tibbiy ekspertizasining dastlabki ma’lumotiga ko‘ra, O.Q.ning o‘limi ko‘plab tan jarohatlari, o‘tkir ichki va tashqi qon yo‘qotishi sabab kelib chiqqan.
Mazkur holat yuzasidan 2021-yilning 6-iyul kuni Toyloq tuman prokuraturasi tomonidan F.Q.ga nisbatan Jinoyat kodeksining 97-moddasi 1-qismi (qasddan odam o‘ldirish) bilan jinoyat ishi qo‘zg‘atilgan. 7-iyul kuni F.Q. jinoyat ishi bo‘yicha ayblanuvchi tariqasida ishtirok etishga jalb qilinib, unga nisbatan qamoqqa olish tarzidagi ehtiyot chorasi qo‘llanilgan.
Viloyat prokuraturasi axborot xizmatining ma’lum qilishicha, F.Q. muqaddam Jinoyat kodeksining 164-moddasi 2-qismi “b” bandi (bosqinchilik) bilan muqaddam JIB Samarqand shahar sudining 2017-yil 5-sentabrdagi hukmiga asosan sudlanib, unga nisbatan 5 yil muddatga ozodlikdan mahrum etish jazosi berilgan. 2021-yil 10-iyun kuni Jinoyat kodeksining 73-moddasi (jazoni o‘tashdan muddatidan ilgari shartli ozod qilish)ga binoan shartli ravishda ozod etilgan.
Hozirda jinoyat ishi yuzasidan Toyloq tuman prokuraturasi tomonidan dastlabki tergov harakatlari olib borilmoqda.
Izoh (0)