Самарқанд вилоятининг Тойлоқ тумани «Галаботир» маҳалласида яшовчи 1999 йилда туғилган Ф.Қ. амакиваччаси 2003 йилда туғилган О.Қ.нинг кўкрак қафасига 10 маротаба пичоқ уриб, уни қасддан ўлдирган. Бу ҳақда «Дарё»га вилоят прокуратураси ахборот хизмати маълум қилди.
Таъкидланишича, 2021 йилнинг 4 июль куни Ф.Қ. амакиваччасининг уйига маст ҳолда келиб, жанжал кўтарган. Шу сабабли қариндошининг турмуш ўртоғи Х.Ш. унга нисбатан қонуний чора кўришни сўраб, туман ИИБга ариза билан мурожаат қилган.2021 йилнинг 6 июль куни, тахминан, соат 15:20 атрофида Ф.Қ. амакиваччасининг ўғли О.Қ. билан ҳам тортишиб қолган. Оқибатда Ф.Қ. амакиваччаси О.Қ.нинг кўкрак қафасига 10 маротаба пичоқ уриб, қасддан ўлдирган.
Тойлоқ туман суд-тиббий экспертизасининг дастлабки маълумотига кўра, О.Қ.нинг ўлими кўплаб тан жароҳатлари, ўткир ички ва ташқи қон йўқотиши сабаб келиб чиққан.
Мазкур ҳолат юзасидан 2021 йилнинг 6 июль куни Тойлоқ туман прокуратураси томонидан Ф.Қ.га нисбатан Жиноят кодексининг 97-моддаси 1-қисми (қасддан одам ўлдириш) билан жиноят иши қўзғатилган. 7 июль куни Ф.Қ. жиноят иши бўйича айбланувчи тариқасида иштирок этишга жалб қилиниб, унга нисбатан қамоққа олиш тарзидаги эҳтиёт чораси қўлланилган.
Вилоят прокуратураси ахборот хизматининг маълум қилишича, Ф.Қ. муқаддам Жиноят кодексининг 164-моддаси 2-қисми «б» банди (босқинчилик) билан муқаддам ЖИБ Самарқанд шаҳар судининг 2017 йил 5 сентябрдаги ҳукмига асосан судланиб, унга нисбатан 5 йил муддатга озодликдан маҳрум этиш жазоси берилган. 2021 йил 10 июнь куни Жиноят кодексининг 73-моддаси (жазони ўташдан муддатидан илгари шартли озод қилиш)га биноан шартли равишда озод этилган.
Ҳозирда жиноят иши юзасидан Тойлоқ туман прокуратураси томонидан дастлабки тергов ҳаракатлари олиб борилмоқда.
Изоҳ (0)