Buxoro viloyatining Olot tumanidagi “Qirtay” mahallasida joylashgan 19-maktabning 1965-yilda qurilgan 240 o‘rinli eski binosi foydalanishga yaroqsiz, deya buzilishga tushgan. Ushbu jarayonda qatnashgan fuqaroning “Daryo”ga ma’lumot berishicha, bino buzilishida saqlab qolingan qurilish materiallari birja orqali sotilgan. Biroq maktab direktori qurilish materiallarining homiylik orqali belgilanganidan ortig‘ini o‘zida qoldirgan. Murojaat yuzasidan surishtiruv olib borgan “Daryo” muxbiri ushbu qurilish materiallari direktor oilasiga tegishli bo‘lgan qurilishi yakunlanmagan do‘konda saqlanayotganiga guvoh bo‘ldi.
Qayd etilishicha, Olot tumanidagi 19-maktab o‘qituvchisi Gulchehra Mavlonova 2021-yilning mart oyida maktab direktori lavozimiga tayinlangan. 2021-yil 16-mart kuni maktabning eski binosini buzish bo‘yicha tanlov e’lon qilingan. Tanlovda “Ozod Luqmon” MChJ g‘olib bo‘lib, 18-mart kuni Olot tuman XTB bilan “Xizmatlar ko‘rsatishga oid” shartnoma imzolagan. Shartnoma shartiga ko‘ra, 15 foiz miqdorda oldindan haq to‘lash nazarda tutilgan. Biroq jamiyat rahbari Zafar Bozorov ushbu shartnomaning bahosini nol qiymatda baholab, homiylik hisobidan binoni buzib, qurilish metariallarini ajratib berishni zimmasiga olgan. Va bir necha kishilik ishchilardan iborat brigadasi bilan faoliyat yuritib kelayotgan, biroq rasmiy maqomga ega bo‘lmagan fuqaro Azamat To‘yevga bino “snos”ini sifatli amalga oshirishni topshirgan. Azamat To‘yev 31-martga qadar o‘z brigadasi bilan ishlab, maktabning eski binosini buzgan va hudud maydonini tekislash ishlarini bajargan.
“Shartnomaga ko‘ra, biz tuman XTBga maktabning eski binosini nol qiymatda buzib, qurilish ashyolarini ajratib berdik. Ishchilar ovqatlanishi va maoshi bilan bog‘liq mablag‘larni ham o‘z zimmamizga oldik. Shunday bo‘ldi ham. Biroq qurilish sohasida brigada tuzib, faoliyat boshlaganimga ko‘p bo‘lmagan. Shuning uchun ishlarimizni hujjatli tartibda amalga oshirishni hali oxiriga yetkazishga ulgurolmaganimiz qiyinchiliklarga duch kelishimga sabab bo‘ldi. Ma’lumki, eski bino buzilgach, o‘z-o‘zidan undan ajratib olingan qurilish xomashyolarini sotish birja orqali amalga oshiriladi. Qurilish xomashyolari yuqori narxda baholangani uchun tanlovda qatnashgan bir nechta firmalar uni sotib olishni rad etdi. Men esa shu orada o‘zimga avvaldan tanish bo‘lgan Romitan tumanidagi ‘Ruslan Ziyokor quruvchi’ korxonasi rahbari Rasul Ramazonov bilan og‘zaki kelishuv asosida ushbu qurilish mollarini o‘zim sotib oldim”, — deydi Azamat To‘yev.
Ta’kidlanishicha, “Ruslan Ziyokor quruvchi” korxonasi tenderda ishtirok etgan bo‘lsa-da, o‘sha vaqtda qurilish xomashyolarini xarid qilib olish uchun hisob-raqamida yetarlicha mablag‘i bo‘lmagan.
“Haqiqatan ham mablag‘ni menga tegishli bo‘lgan firma nomidan norasmiy qurilish brigadasi yetakchisi Azamat To‘yev o‘z hisobidan amalga oshirdi. Korxonam orqali birjada belgilangan eng yuqori narx — 7 million 373 ming so‘m mablag‘ evaziga qurilish xomashyolarini xarid qilib oldik”, — dedi Rasul Ramazonov.
Korxona rahbarining bildirishicha, sotib olingan eski yog‘och va taxtalar maktabdan olib ketilayotgan jarayonda maktab direktori Gulchehra Mavlonova maktab ta’mirida muammolar ko‘pligini aytib, ushbu materiallarni homiylik asosida qoldirib ketishini so‘ragan. Avvaliga Rasul Ramazonov buni rad etgan. Maktab direktori esa homiylik ko‘rsatishini qayta-qayta so‘ragan. Rasul Ramazonov ayol so‘rayotgani vaji bilan qurilish mollaridan tashqari, bahosi o‘rtacha 5—6 million so‘m bo‘lgan qurilish xomashyolarini ham Azamat To‘yevdan so‘roqsiz homiylik sifatida maktabda qoldirgan va bu haqdagi bayonnomani imzolagan.
“To‘g‘ri, bu men tomonimdan birovning omonatiga xiyonat sanalishi mumkin, ammo ayolning iltimosi, keyinchalik talabga o‘tishi meni noqulay ahvolda qoldirdi. So‘ngra maktabning ta’mirga zarurati bo‘lgan bitta sinfxona poli hajmini o‘lchab, belgilab berdim. Maktabda qoldiriladigan xomashyolar ro‘yxatini shakllantirib, bayonnomani imzoladim. Ammo mening ishchi guruhim tomonidan olib ketilgan qurilish mollari manzilga yetkazilganida ko‘rib chiqqanimizda, homiylikdan tashqari, qariyb 20 milllionlik ortiqcha yog‘och va taxtalar yashirin ravishda maktab rahbariyati tomonidan ushlab qolinganiga guvoh bo‘ldik”, — deydi Ramazon Rasulov.
Shundan so‘ng homiylik sifatida qoldirilgan yaroqsiz taxtalardan tashqari, maktab direktorining korxona rahbaridan so‘roqsiz bayonnomada ko‘rsatilganidan ortiqcha saqlab qolingan qurilish ashyolari qismini qaytarib olish muammoga aylangan. Maktab direktori bilan firma rahbari hamda norasmiy quruvchi o‘rtasida o‘zaro kelishmovchilik boshlangan.
“Men yuridik shaxs emasligimni tan olaman, ammo pul meniki. Maktab direktori har so‘zida o‘g‘lining DXXda faoliyat yuritishi va tuman hokimi bilan yaqin ekanini, yetmagandek, o‘zining beobro‘ligi orqali tuzilgan homiylik shartnomasini ro‘kach qilib, bir necha marta talab qilib kelishimizga qaramay qurilish mollarini qaytarmadi. ‘Nima qilsang, qayerga murojaat qilsang ham men qurilish mollarini qaytarmayman’, deb beoro‘likdan nariga o‘tmadi”, — deydi Azamat To‘yev.
Ma’lum bo‘lishicha, qariyb ikki oy davom etgan ushbu mojarodan tuman hokimi ham xabardor qilingan. Olot tumani hokimi matbuot kotibi Eldor Qobilovga ko‘ra, tuman hokimi, tuman prokurori, shuningdek, tuman xalq ta’limi bo‘limi mudiri maktab direktoridan ushbu mojaroli qurilish xomashyolarini korxonaga qaytarish zarurligini bildirgan. Biroq maktab direktori talabni amalga oshirmagan.
“Mazkur maktabning 210 o‘rinli birinchi o‘quv binosi 2005-yilda, ikki qavatli 300 o‘rinli yangi binosi esa 2015-yilda qurilgan bo‘lib, har ikki bino 2019-yilda to‘liq kapital ta’mirdan chiqqan. Maktab direktori o‘quv binosi va sinfxonalarning ta’mirtalabligi, shuningdek, eski binosi buzilishidan olingan qurilish materiallarini homiylik sifatida saqlab qolinayotgani to‘g‘risida bo‘limimiz bilan kengashmagan. Korxona tomonidan xarid qilingan va homiylikdan tashqari ushlab qolingan ortiqcha xomashyodan direktor maktab qorovulxonasini tiklashni ko‘zlagan ekan, ta’lim tizimida bunday obro‘sizlik yarashmaydi. Bolalar tahsil oladigan dargohda bunday mojaroli xomashyodan foydalanilishiga mutlaqo qarshiman”, — deydi tuman XTB mudiri Farrux Ko‘makov.
“Daryo” muxbiri surishtiruv jarayonida eski bino buzilishidan qolgan qurilish materiallari qayerlarda ishlatilgani va saqlanayotgani bilan qiziqqan. Gulchehra Mavlonova bunga javoban 70 kub metr taxtaning sinfxona poliga yotqizilgani, shuningdek, maktab qorovulxonasini tiklash uchun mo‘ljallanayotgani, u xomashyolar maktab hovlisi hamda shu yaqin hududdagi tadbirkorlardan birining do‘konida saqlab kelinayotganini aytgan. O‘sha qurilishi tugallanmagan bino maktab direktorining turmush o‘rtog‘i G‘ani Maqsudovga tegishli ekani ma’lum bo‘lgan.
“Qurilish xomashyolarining o‘g‘irlab ketilmasligi uchun qilganmiz bu ishni. Bundan ichki ishlar xodimi Aziz Asadov ham xabardor. Uning guvohligida biz ushbu mollarni shu yerga bosib qo‘yganmiz”, — dedi iddao bilan vaziyatdan chiqishga harakat qilgan maktab direktori.
Ichki ishlar xodimlari bilan yuzma-yuz suhbatda esa Aziz Asadov maktab direktori vajini rad etdi. Unga qurilish mollari o‘g‘irlab ketilmasligi uchun maktabning birorta sinfida qulflab qo‘yish talabi qo‘yilganini, biroq maktab direktori ularni o‘z oilasiga tegishli do‘konga keltirib, qulflab qo‘yganidan keyingina ichki ishlar xodimlariga ma’lum qilganini bildirdi.
“Daryo” surishtiruvi hamda soha mutasaddilari o‘rganuvidan so‘ng ortiqcha saqlab qolingan qurilish xomashyolari “Ruslan Ziyokor quruvchi” korxonasi rahbari Rasul Ramazonovga jo‘natilishi haqida qaror qilingan. Biroq maktab direktori qurilish xomashyolarining olib ketilishiga rozilik bermagan.
“Ancha tortishuvlardan keyingina homiylikdan tashqari, o‘zimiz birja orqali xarid qilib olganimiz va maktabda ortiqcha miqdorda ushlab qolingan qurilish xomashyolarini kengash tomonidan imzolangan hujjatga asosan, qaytarib olishga erishdik. Holatga odilona yondashgan tuman mutasaddilari, xalq ta’limi tizimi mas’ullari hamda ‘Daryo’ tahririyatiga minnatdorlik bildiramiz”, — dedi Azamat To‘yev.
Izoh (0)