Andijonda koronavirusga chalingan bemorga tashxis qo‘yish uchun o‘tkaziladigan kompyuter tomografiyasi xarajatlarining yarmi mahalliy budjetdan to‘lanadigan bo‘ldi

Andijon viloyatida koronavirusga chalingan har bir bemorga tashxis qo‘yish hamda kasallikning davolash usullarini belgilash maqsadida o‘tkaziladigan, o‘pkaning multispiral kompyuter tomografiyasi tekshiruvi uchun to‘lanadigan summaning 50 foizi mahalliy budjet mablag‘lari hisobidan qoplanadi. Bu haqda “Daryo”ga viloyat Sog‘liqni saqlash boshqarmasi boshlig‘i Salohiddin Yusupov ma’lum qildi.

“Hozirda viloyatdagi 5 ta xususiy tibbiyot muassasasidagi 7 ta MSKT apparatida tekshiruvlar amalga oshirilmoqda. Ushbu tekshiruvlarning narxi har biri o‘rtacha 220—250 ming so‘mni tashkil etadi. Viloyat hokimi Shuhrat Abdurahmonov tashabbusi bilan aholining imkoniyati cheklangan qismi uchun kompyuter tomografiya tekshiruviga to‘lanadigan xizmat haqining 50 foizi mahalliy budjet mablag‘lari hisobidan qoplab berilishi belgilandi. Natijada har bir tekshiruv narxi 100—120 ming so‘mga tushadi. Buning uchun xususiy tibbiyot muassasalarida tekshiruvdan o‘tadiganlar o‘zlari yashaydigan hududiy ko‘p tarmoqli markaziy poliklinikadan maxsus blankada yo‘llanma olib kelishlari lozim bo‘ladi. Dastlabki hisob-kitoblarga ko‘ra, har bir kompyuter tomografiya apparati bir kunda 50 nafar bemorni tekshiruvdan o‘tkazsa, bir oyda 1500 nafar bemorni qamrab olish imkoniyatiga ega bo‘ladi. Natijada bir oyda o‘rtacha 10 ming 500 nafar bemor imtiyozli tekshiruvdan o‘tkazilishi ta’minlanadi. Ushbu xususiy tibbiyot muassasalariga mahalliy budjet mablag‘lari hisobidan 1 milliard 50 million so‘m mablag‘ o‘tkazib berilishi ko‘zda tutilgan”, — deydi Salohiddin Yusupov.

Avvalroq, 14-iyul holatiga ko‘ra, Andijonda koronavirusga chalingan hamda unda gumon qilingan 1061 nafar bemor davolanayotganligi ma’lum qilingandi.