Бухоро вилоятининг Олот туманидаги «Қиртай» маҳалласида жойлашган 19-мактабнинг 1965 йилда қурилган 240 ўринли эски биноси фойдаланишга яроқсиз, дея бузилишга тушган. Ушбу жараёнда қатнашган фуқаронинг «Дарё»га маълумот беришича, бино бузилишида сақлаб қолинган қурилиш материаллари биржа орқали сотилган. Бироқ мактаб директори қурилиш материалларининг ҳомийлик орқали белгиланганидан ортиғини ўзида қолдирган. Мурожаат юзасидан суриштирув олиб борган «Дарё» мухбири ушбу қурилиш материаллари директор оиласига тегишли бўлган қурилиши якунланмаган дўконда сақланаётганига гувоҳ бўлди.
Қайд этилишича, Олот туманидаги 19-мактаб ўқитувчиси Гулчеҳра Мавлонова 2021 йилнинг март ойида мактаб директори лавозимига тайинланган. 2021 йил 16 март куни мактабнинг эски биносини бузиш бўйича танлов эълон қилинган. Танловда «Озод Луқмон» МЧЖ ғолиб бўлиб, 18 март куни Олот туман ХТБ билан «Хизматлар кўрсатишга оид» шартнома имзолаган. Шартнома шартига кўра, 15 фоиз миқдорда олдиндан ҳақ тўлаш назарда тутилган. Бироқ жамият раҳбари Зафар Бозоров ушбу шартноманинг баҳосини ноль қийматда баҳолаб, ҳомийлик ҳисобидан бинони бузиб, қурилиш метариалларини ажратиб беришни зиммасига олган. Ва бир неча кишилик ишчилардан иборат бригадаси билан фаолият юритиб келаётган, бироқ расмий мақомга эга бўлмаган фуқаро Азамат Тўевга бино «снос»ини сифатли амалга оширишни топширган. Азамат Тўев 31 мартга қадар ўз бригадаси билан ишлаб, мактабнинг эски биносини бузган ва ҳудуд майдонини текислаш ишларини бажарган.
«Шартномага кўра, биз туман ХТБга мактабнинг эски биносини ноль қийматда бузиб, қурилиш ашёларини ажратиб бердик. Ишчилар овқатланиши ва маоши билан боғлиқ маблағларни ҳам ўз зиммамизга олдик. Шундай бўлди ҳам. Бироқ қурилиш соҳасида бригада тузиб, фаолият бошлаганимга кўп бўлмаган. Шунинг учун ишларимизни ҳужжатли тартибда амалга оширишни ҳали охирига етказишга улгуролмаганимиз қийинчиликларга дуч келишимга сабаб бўлди. Маълумки, эски бино бузилгач, ўз-ўзидан ундан ажратиб олинган қурилиш хом ашёларини сотиш биржа орқали амалга оширилади. Қурилиш хом ашёлари юқори нархда баҳолангани учун танловда қатнашган бир нечта фирмалар уни сотиб олишни рад этди. Мен эса шу орада ўзимга аввалдан таниш бўлган Ромитан туманидаги ‘Руслан Зиёкор қурувчи’ корхонаси раҳбари Расул Рамазонов билан оғзаки келишув асосида ушбу қурилиш молларини ўзим сотиб олдим», — дейди Азамат Тўев.
Таъкидланишича, «Руслан Зиёкор қурувчи» корхонаси тендерда иштирок этган бўлса-да, ўша вақтда қурилиш хом ашёларини харид қилиб олиш учун ҳисоб-рақамида етарлича маблағи бўлмаган.
«Ҳақиқатан ҳам маблағни менга тегишли бўлган фирма номидан норасмий қурилиш бригадаси етакчиси Азамат Тўев ўз ҳисобидан амалга оширди. Корхонам орқали биржада белгиланган энг юқори нарх — 7 миллион 373 минг сўм маблағ эвазига қурилиш хом ашёларини харид қилиб олдик», — деди Расул Рамазонов.
Корхона раҳбарининг билдиришича, сотиб олинган эски ёғоч ва тахталар мактабдан олиб кетилаётган жараёнда мактаб директори Гулчеҳра Мавлонова мактаб таъмирида муаммолар кўплигини айтиб, ушбу материалларни ҳомийлик асосида қолдириб кетишини сўраган. Аввалига Расул Рамазонов буни рад этган. Мактаб директори эса ҳомийлик кўрсатишини қайта-қайта сўраган. Расул Рамазонов аёл сўраётгани важи билан қурилиш молларидан ташқари, баҳоси ўртача 5—6 миллион сўм бўлган қурилиш хом ашёларини ҳам Азамат Тўевдан сўроқсиз ҳомийлик сифатида мактабда қолдирган ва бу ҳақдаги баённомани имзолаган.
«Тўғри, бу мен томонимдан бировнинг омонатига хиёнат саналиши мумкин, аммо аёлнинг илтимоси, кейинчалик талабга ўтиши мени ноқулай аҳволда қолдирди. Сўнгра мактабнинг таъмирга зарурати бўлган битта синфхона поли ҳажмини ўлчаб, белгилаб бердим. Мактабда қолдириладиган хом ашёлар рўйхатини шакллантириб, баённомани имзоладим. Аммо менинг ишчи гуруҳим томонидан олиб кетилган қурилиш моллари манзилга етказилганида кўриб чиққанимизда, ҳомийликдан ташқари, қарийб 20 милллионлик ортиқча ёғоч ва тахталар яширин равишда мактаб раҳбарияти томонидан ушлаб қолинганига гувоҳ бўлдик», — дейди Рамазон Расулов.
Шундан сўнг ҳомийлик сифатида қолдирилган яроқсиз тахталардан ташқари, мактаб директорининг корхона раҳбаридан сўроқсиз баённомада кўрсатилганидан ортиқча сақлаб қолинган қурилиш ашёлари қисмини қайтариб олиш муаммога айланган. Мактаб директори билан фирма раҳбари ҳамда норасмий қурувчи ўртасида ўзаро келишмовчилик бошланган.
«Мен юридик шахс эмаслигимни тан оламан, аммо пул меники. Мактаб директори ҳар сўзида ўғлининг ДХХда фаолият юритиши ва туман ҳокими билан яқин эканини, етмагандек, ўзининг беобрўлиги орқали тузилган ҳомийлик шартномасини рўкач қилиб, бир неча марта талаб қилиб келишимизга қарамай қурилиш молларини қайтармади. ‘Нима қилсанг, қаерга мурожаат қилсанг ҳам мен қурилиш молларини қайтармайман’, деб беорўликдан нарига ўтмади», — дейди Азамат Тўев.
Маълум бўлишича, қарийб икки ой давом этган ушбу можародан туман ҳокими ҳам хабардор қилинган. Олот тумани ҳокими матбуот котиби Элдор Қобиловга кўра, туман ҳокими, туман прокурори, шунингдек, туман халқ таълими бўлими мудири мактаб директоридан ушбу можароли қурилиш хом ашёларини корхонага қайтариш зарурлигини билдирган. Бироқ мактаб директори талабни амалга оширмаган.
«Мазкур мактабнинг 210 ўринли биринчи ўқув биноси 2005 йилда, икки қаватли 300 ўринли янги биноси эса 2015 йилда қурилган бўлиб, ҳар икки бино 2019 йилда тўлиқ капитал таъмирдан чиққан. Мактаб директори ўқув биноси ва синфхоналарнинг таъмирталаблиги, шунингдек, эски биноси бузилишидан олинган қурилиш материалларини ҳомийлик сифатида сақлаб қолинаётгани тўғрисида бўлимимиз билан кенгашмаган. Корхона томонидан харид қилинган ва ҳомийликдан ташқари ушлаб қолинган ортиқча хом ашёдан директор мактаб қоровулхонасини тиклашни кўзлаган экан, таълим тизимида бундай обрўсизлик ярашмайди. Болалар таҳсил оладиган даргоҳда бундай можароли хом ашёдан фойдаланилишига мутлақо қаршиман», — дейди туман ХТБ мудири Фаррух Кўмаков.
«Дарё» мухбири суриштирув жараёнида эски бино бузилишидан қолган қурилиш материаллари қаерларда ишлатилгани ва сақланаётгани билан қизиққан. Гулчеҳра Мавлонова бунга жавобан 70 куб метр тахтанинг синфхона полига ётқизилгани, шунингдек, мактаб қоровулхонасини тиклаш учун мўлжалланаётгани, у хом ашёлар мактаб ҳовлиси ҳамда шу яқин ҳудуддаги тадбиркорлардан бирининг дўконида сақлаб келинаётганини айтган. Ўша қурилиши тугалланмаган бино мактаб директорининг турмуш ўртоғи Ғани Мақсудовга тегишли экани маълум бўлган.
«Қурилиш хом ашёларининг ўғирлаб кетилмаслиги учун қилганмиз бу ишни. Бундан ички ишлар ходими Азиз Асадов ҳам хабардор. Унинг гувоҳлигида биз ушбу молларни шу ерга босиб қўйганмиз», — деди иддао билан вазиятдан чиқишга ҳаракат қилган мактаб директори.
Ички ишлар ходимлари билан юзма-юз суҳбатда эса Азиз Асадов мактаб директори важини рад этди. Унга қурилиш моллари ўғирлаб кетилмаслиги учун мактабнинг бирорта синфида қулфлаб қўйиш талаби қўйилганини, бироқ мактаб директори уларни ўз оиласига тегишли дўконга келтириб, қулфлаб қўйганидан кейингина ички ишлар ходимларига маълум қилганини билдирди.
«Дарё» суриштируви ҳамда соҳа мутасаддилари ўрганувидан сўнг ортиқча сақлаб қолинган қурилиш хом ашёлари «Руслан Зиёкор қурувчи» корхонаси раҳбари Расул Рамазоновга жўнатилиши ҳақида қарор қилинган. Бироқ мактаб директори қурилиш хом ашёларининг олиб кетилишига розилик бермаган.
«Анча тортишувлардан кейингина ҳомийликдан ташқари, ўзимиз биржа орқали харид қилиб олганимиз ва мактабда ортиқча миқдорда ушлаб қолинган қурилиш хом ашёларини кенгаш томонидан имзоланган ҳужжатга асосан, қайтариб олишга эришдик. Ҳолатга одилона ёндашган туман мутасаддилари, халқ таълими тизими масъуллари ҳамда ‘Дарйў таҳририятига миннатдорлик билдирамиз», — деди Азамат Тўев.
Изоҳ (0)