O‘zbekistonda so‘nggi bir yilda 2 mln so‘mdan ko‘p oylik oladiganlar soni ko‘paydi

O‘zbekistonda 2 million so‘mdan ko‘proq oylik maoshi oladigan fuqarolar soni oshdi, deya xabar bermoqda Moliya vazirligi.

Vazirlik Davlat budjeti daromadlarining 2021-yil I yarim yillik ijrosi bo‘yicha dastlabki natijalarini ma’lum qildi.

Ma’lum bo‘lishicha, hisobot davrida daromadi oshgan xodimlar soni ko‘paygan. Xususan, may oyida 2—4 million so‘m olganlar 1 720 600 nafarni (umumiy to‘lovchilar sonidagi salmog‘i 21,3 foizdan 23,1 foizgacha oshgan), 4—5,5 million so‘m olganlar 293 ming nafarni (salmog‘i 4,7 foizdan 6,3 foizgacha oshgan), 5,5 million so‘mdan yuqori olganlar 387 ming nafarni tashkil qilgan (salmog‘i 5,8 foizdan 8,3 foizgacha oshgan).

Bundan tashqari, 1 million so‘mgacha (1 million 778 ming) va 1—2 million so‘m oylik oladiganlar (1 million 118 ming nafar) soni mos ravishda 42,6 foiz va 25,6 foizdan 38,3 foiz va 24 foizga kamaygan.

Bundan avval O‘zbekistonda avgust oyida “temir daftar”dagi oilalarning 18 yoshgacha bo‘lgan farzandlariga 500 ming so‘mdan berilishi, Toshkent metropoliteni xodimlari oyligini oshirish rejalashtirilayotgani hamda o‘zbekistonlik sudyalarning eng kam maoshi necha million so‘mdan boshlanishi ma’lum qilingani haqida xabar berilgandi.