“O‘zbekiston 24” telekanalida Davlat xavfsizlik xizmati tomonidan joylarda yer va ko‘chmas mulk obyektlarining noqonuniy savdosiga oid holatlar fosh etilganiga oid lavha efirga uzatildi.
Ma’lum bo‘lishicha, Farg‘ona viloyatida transport xizmati bilan shug‘ullanuvchi MChJ rahbari rieltorlik bilan shug‘ullanuvchi MChJ boshlig‘i va yana ikki nafar fuqaro bilan kelishib, boshqa bir fuqaroga qurilish balansida bo‘lgan 50 sotix yer maydonini 25 ming dollarga sotmoqchi bo‘lganida DXX xodimlari tomonidan ushlangan.
Shuningdek, Davlat kadastri palatasining Namangandagi bo‘limi rahbari va bosh mutaxassisi yer bilan bog‘liq firibgarlik, ya’ni boshqa fuqarodan 6 ming dollar va 42 million so‘m olgani aniqlangan.
Bundan tashqari, Sirdaryo viloyatining Paxtakor tumanida fermer chorvachilik uchun ajratilgan fermer xo‘jaligi yeridan 20 gektarini boshqa fuqaro nomiga o‘tkazishni va’da qilib, u buning uchun undan 8 ming dollar talab qilgan. Fermer so‘ralgan puldan 7,5 ming dollarini olgan vaqtida ushlangan.
Toshkent shahri Chilonzor tumanida yashovchi shaxs esa Yangihayot tumanida yashovchi fuqaroga mansabdor tanishlari orqali Sergeli tumanidan 1,2 sotix yerni olib berishini va’da qilib, evaziga 12 ming dollar so‘ragani aniqlangan. Ushbu shaxs so‘ralgan puldan 6 ming dollarini olgan vaqtda ushlangan.
Shuningdek, Navoiy viloyati Qiziltepa tumanida yashovchi fuqaro tuman hokimi qarori bilan dehqonchilik uchun o‘z otasi nomiga rasmiylashtirilgan 50 sotix va uning yonida joylashgan yana shuncha yerni mansabdor tanishlari orqali xaridorga sotmochi bo‘lib, xaridordan 8 ming dollar so‘ragan. U so‘ralgan puldan 4 ming dollarini olgan vaqtida ushlangan.
Hozirda ushbu shaxslarga nisbatan jinoyat ishi qo‘zg‘atilib, tergov harakatlari olib borilmoqda.
Avvalroq DXX Bo‘stonliqda ot sportiga ajratilgan 25,4 gektar yerni 1,5 million dollarga sotmoqchi bo‘lgan shaxsni qo‘lga olgani, O‘zbekistonda endi noqonuniy qurilish va yerni o‘zboshimchalik bilan egallash to‘g‘risida Telegram-bot orqali xabar berish mumkinligi, Bo‘stonliqdagi “Bochka” dam olish maskani hududidan fuqaroga 450 ming dollarga yer sotmoqchi bo‘lgan shaxs ushlangani, Jizzax va Buxoroda yerlarni noqonuniy ravishda sotish holatlari aniqlangani haqida xabar berilgandi.
Izoh (0)