Buxoro davlat tibbiyot institutida koronavirus infeksiyasini tez fursatda aniqlash va aniq tashxis qo‘yishga mo‘ljallangan ilmiy laboratoriya ish boshladi, deya xabar bermoqda “Daryo” muxbiri.
Ilmiy laboratoriya mudiri Nilufar Ahmedovaga ko‘ra, mazkur laboratoriya Buxoro davlat tibbiyot institutining eski binosida tashkil etilgan bo‘lib, bino ikki oy davomida qayta ta’mirlangan va zamonaviy qiyofaga keltirilgan. Italiya va Germaniyadan keltirilgan tibbiy jihozlar bilan ta’minlangan.
“Koronavirusni tez fursatda aniqlash va aniq tashxis qo‘yishga mo‘ljallangan ushbu ilmiy laboratoriya 145 ta turdagi qon tahlillari bo‘yicha tashxis o‘tkazishga mo‘ljallangan bo‘lib, ayni paytgacha bu borada 70 turdan ortiq shunday tibbiy tashxislar amalga oshirildi. Ilmiy laboratoriyamiz tomonidan qon orqali yuquvchi ko‘plab kasalliklarning tahliliy natijalarini tez fursatlarda aniqlanishi o‘z-o‘zidan ularni tezroq davolash imkoniyatini beradi”, — dedi Nilufar Ahmedova.
Bildirilishicha, virusning mavjudligini qisqa fursatda aniqlab beruvchi ushbu ilmiy laboratoriyada vaksinatsiya jarayonlaridan oldin ham qon tarkibini aniqlab olish mumkin.
“Bu esa emlashdan so‘ng bemor holatining muvozanatda bo‘lishini ta’minlaydi”, — deydi Nilufar Ahmedova.
Buxoro davlat tibbiyot instituti rektori Shuhrat Teshayevning “Daryo”ga ma’lum qilishicha, ilmiy laboratoriyada eng avvalo institut xodimlari hamda talabalari salomatligi tekshiruvdan o‘tkazilgan.
“Oliygohimizda joriy o‘quv yilida 5409 talaba institutda tahsil olayotgan bo‘lsa, shundan 467 nafari xorijlik talabalardan iborat. Xorijlik talabalarimizning olti nafarida koronavirus infeksiyasi musbat chiqqan bo‘lsa, ikki nafari viloyat yuqumli kasalliklar shifoxonasiga davolanish uchun jo‘natildi. Ular bilan muloqotda bo‘lgan barcha talabalar ham qayta tekshiruvdan o‘tkazildi hamda Talabalar turar joyi qat’iy tibbiy nazoratga olindi”, — deydi Shuhrat Teshayev.
Izoh (0)