Shavkat Mirziyoyev O‘zbekistonda Qurbon hayitini nishonlash va uni o‘tkazish haqida qaror imzoladi.
Qarorga ko‘ra, O‘zbekiston musulmonlari idorasining 2021-yilda Qurbon hayitining birinchi kuni 20-iyul – seshanbaga to‘g‘ri kelishi haqida qabul qilgan qarorini inobatga olib, mamlakatda 2021-yil 20-iyul kuni Qurbon hayiti bayrami etib belgilandi.
O‘zbekiston Prezidentining 2021-yil 10-maydagi “O‘zbekiston Respublikasi Prezidentining 2020-yil 3-dekabrdagi “2021-yilda rasmiy sanalarni nishonlash davrida qo‘shimcha ishlanmaydigan kunlarni belgilash va dam olish kunlarini ko‘chirish to‘g‘risida”gi PF–6122-son farmoniga o‘zgartirishlar kiritish to‘g‘risida”gi PF–6222-son farmoni bilan 2021-yil 21–22-iyul kunlari ham dam olish kunlari sifatida belgilanganligi ma’lumot uchun qabul qilindi.
Qoraqalpog‘iston Vazirlar Kengashi, viloyatlar va Toshkent shahar hokimliklari Vazirlar Mahkamasi huzuridagi Din ishlari bo‘yicha qo‘mita, Mahalla va oilani qo‘llab-quvvatlash vazirligi hamda jamoat tashkilotlari bilan hamkorlikda Qurbon hayitini karantin talablariga amal qilgan holda xalqning milliy va diniy an’analariga mos ravishda oila davrasida o‘tkazish afzalligi haqida keng tushuntirish ishlarini amalga oshirilishi belgilandi.
O‘zbekiston Milliy teleradiokompaniyasi, O‘zbekiston Milliy axborot agentligi va boshqa ommaviy axborot vositalariga Qurbon hayitini nishonlash bilan bog‘liq tadbirlarni yoritish tavsiya etildi.
Avvalroq Qurbon hayiti namozi masjidlarda ochiq havoda o‘qilishi haqida xabar berilgandi.
Izoh (0)