Бухоро давлат тиббиёт институтида коронавирус инфекциясини тез фурсатда аниқлаш ва аниқ ташхис қўйишга мўлжалланган илмий лаборатория иш бошлади, дея хабар бермоқда «Дарё» мухбири.
Илмий лаборатория мудири Нилуфар Аҳмедовага кўра, мазкур лаборатория Бухоро давлат тиббиёт институтининг эски биносида ташкил этилган бўлиб, бино икки ой давомида қайта таъмирланган ва замонавий қиёфага келтирилган. Италия ва Германиядан келтирилган тиббий жиҳозлар билан таъминланган.
«Коронавирусни тез фурсатда аниқлаш ва аниқ ташхис қўйишга мўлжалланган ушбу илмий лаборатория 145 та турдаги қон таҳлиллари бўйича ташхис ўтказишга мўлжалланган бўлиб, айни пайтгача бу борада 70 турдан ортиқ шундай тиббий ташхислар амалга оширилди. Илмий лабораториямиз томонидан қон орқали юқувчи кўплаб касалликларнинг таҳлилий натижаларини тез фурсатларда аниқланиши ўз-ўзидан уларни тезроқ даволаш имкониятини беради», — деди Нилуфар Аҳмедова.
Билдирилишича, вируснинг мавжудлигини қисқа фурсатда аниқлаб берувчи ушбу илмий лабораторияда вакцинация жараёнларидан олдин ҳам қон таркибини аниқлаб олиш мумкин.
«Бу эса эмлашдан сўнг бемор ҳолатининг мувозанатда бўлишини таъминлайди», — дейди Нилуфар Аҳмедова.
Бухоро давлат тиббиёт институти ректори Шуҳрат Тешаевнинг «Дарё»га маълум қилишича, илмий лабораторияда энг аввало институт ходимлари ҳамда талабалари саломатлиги текширувдан ўтказилган.
«Олийгоҳимизда жорий ўқув йилида 5409 талаба институтда таҳсил олаётган бўлса, шундан 467 нафари хорижлик талабалардан иборат. Хорижлик талабаларимизнинг олти нафарида коронавирус инфекцияси мусбат чиққан бўлса, икки нафари вилоят юқумли касалликлар шифохонасига даволаниш учун жўнатилди. Улар билан мулоқотда бўлган барча талабалар ҳам қайта текширувдан ўтказилди ҳамда Талабалар турар жойи қатъий тиббий назоратга олинди», — дейди Шуҳрат Тешаев.
Изоҳ (0)