Европа чегара агентлиги (Frontex) муҳожирлар оқимининг кўпайиши муносабати билан Литва ва Беларусь чегараларида шошилинч операция ўтказилишини эълон қилди. Вильнюс ёрдам ҳақида 10 июль куни Брюсселга расмий сўров юборди, деб ёзмоқда «РБК».
Литва чегарачиларига ёрдам бериш учун эса Frontex 1 июлдан мамлакатга мутахассислар ва жиҳозларни юборишни бошлаганди.
«Литва ва Беларусь чегарасидаги вазият хавотирли бўлиб қолмоқда. Мен Европа Иттифоқининг ташқи чегарасини мустаҳкамлаш учун тезкор чегара аралашувини амалга оширишга қарор қилдим»— деди Европа Иттифоқи чегара агентлигининг ижрочи директори Фабрис Леггери.
Унинг сўзларига кўра, чегарачилар, патруль машиналари, шунингдек, ходимларнинг қўшимча кучлари Беларусь—Литва чегарасига муҳожирлар билан музокаралар олиб бориш ва уларнинг жиноий ташкилотларга алоқаси тўғрисида маълумот тўплаш учун юборилади.
Frontex маълумотларига кўра, биргина июль ойининг дастлабки ҳафтасида Литва ҳукумати Беларусь билан чегаранинг ноқонуний кесиб ўтилиши бўйича 800 дан ортиқ ҳолатни қайд этди.
Аввалига муҳожирларнинг аксарияти Ироқ, Эрон ва Суриядан келган бўлса, яқинда расмийлар миграция оқимлари таркибидаги ўзгаришларни пайқади. Июль ойидаги муҳожирларнинг аксарияти Конго Республикаси, Гамбия, Гвинея, Мали ва Сенегалдан келган.
10 июль, шанба куни Литва президенти Гитанас Науседа ва агентлик раҳбари Фабрис Леггери ўртасида музокаралар бўлиб ўтди. Науседа Европа агентлиги Литвага бир нечта вертолёт юборишини маълум қилди.
Кейинчалик Польшага ташрифи чоғида Науседа мигрантларни Лукашенконинг «сиёсий қуроли» деб атади. «Биз Беларусь режимининг муҳожирлардан сиёсий қурол сифатида фойдаланишига йўл қўймаймиз», — деб таъкидлади Литва президенти.
Литва маълумотларига кўра, 2021 йил бошидан бери Беларусь билан чегарада Ироқ, Конго, Камерун, Гвинея, Эрон ва бошқа мамлакатлар фуқароларини ўз ичига олган 1577 муҳожир қўлга олинган. 2 июль куни Литва ҳукумати фавқулодда ҳолат эълон қилди.
Сўнгги ойларда Беларусь ҳудудидан чегарани ноқонуний кесиб ўтаётганлар сони қарийб 20 бараварга ошди. Беларусь президенти Александр Лукашенко Европа санкцияларига жавобан унинг мамлакати энди ноқонуний миграцияга қарши курашда Евроиттифоққа ёрдам бермаслигини айтгач, вазият шундай тус олди. Санкциялар Ryanair самолётининг Минскка мажбурий қўндирилиши юзасидан киритилган эди.
Аввалроқ Литва ноқонуний муҳожирлар оқими туфайли Беларусь билан чегарада девор қуришини маълум қилганди. Литва ва Беларусь ўртасидаги чегара узунлиги 678,8 километрни ташкил қилади. Ҳозирда чегаранинг 78 километрлик қисмига девор ўрнатилган. Тахминан 92,5 километр масофага девор ўрнатиш мумкин эмас, чунки у ерда чегара сув ҳавзалари орқали ўтади. Шундай қилиб, чегаранинг 508 километр қисмига девор ўрнатиш керак бўлади.
Изоҳ (0)