Sayohat kishini tavakkal qilish, kezi kelsa mustaqil qaror qilish va avval his qilib ko‘rmagan tuyg‘ularni tuyish imkonini beradi. Bu nafaqat kattalar, balki bolalar ruhiyatiga ham ta’sir qiladi. Bolalar psixologlarining ta’kidlashicha, sayohat va sarguzashtlar haqidagi multfilmlar bolalarning o‘ziga bo‘lgan ishonchining oshishiga hissa qo‘shadi: o‘g‘il yoki qiz qahramonlarga taqlid qiladi, ular kabi yuksak marralarni zabt etish va oldiga maqsad qo‘yish istagi paydo bo‘ladi.
“Yo‘qotilgan rishta”
2019-yilda taqdim qilingan mazkur multfilmni tomosha qilish jarayonida qahramonlar, xususan, Qor odamning Himolayga sayohati va sayohat davomidagi sarguzashtlariga guvoh bo‘lish mumkin.
“Volt”
2008-yilda ekran yuzini ko‘rgan “Volt” multfilmida esa oq it, qora mushuk va olovrang og‘maxon Amerikaning bir tomonidan boshqa bir tarafga sayohatga otlanadi.
“Madagaskar-3”
2012-yilda taqdim qilingan “Madagaskar”ning uchinchi qismida esa hayvonlar Afrikadan boshlari oqqan tomon harakatlanadi va yo‘l-yo‘lakay bir-biridan qiziqarli hodisalarga duch keladi.
“Jirafa”
2011-yilda muxlislar e’tiboriga havola etilgan multfilmi esa afrikalik Mako ismli bolakay va uning do‘sti jirafaning Parijdagi sayohatini o‘zida mujassam etgan. Multfilmning real voqealik asosida suratga olingani esa unga bo‘lgan qiziqishning yanada ortishiga sabab bo‘ladi.
“Shimolga eltuvchi uzoq yo‘l”
2015-yil ekran yuzini ko‘rgan mazkur multfilmda peterburglik Sasha ismli qizaloq shimoliy-qutbga sayohatga otlanadi. Sarguzashtlarga boy bo‘lgan ijod mahsuli qutbdagi hayot va undagi o‘ziga xosliklarni ochib berishi bilan nafaqat bolalar, balki kattalarga ham birdek qiziqarli bo‘lishiga shubha yo‘q.
“Anastasiya”
1997-yilda taqdim qilingan multfilm sujetiga ko‘ra, Nastya ismli qiz Parijga sayohat qiladi. O‘z sevgisi va sodiq do‘stlarni uchratish bilan birga, bir qancha sarguzashtlarni ham boshdan kechiradi.
“Etik kiygan mushukning dunyo bo‘ylab sayohati”
Jyul Vernning asari bir necha marta ekranlashtirilganiga qaramay, ular orasida multfilm u qadar ko‘p emas. 1976-yilda yaponiyalik ijodkorlar tomonidan anime ko‘rinishida taqdim qilingan versiya esa o‘ziga xosligi bilan ko‘plab muxlislar qalbidan joy olgan. Unda etik kiygan bosh qahramon mushuk do‘stlari bilan dunyo bo‘ylab safarga otlanadi.
“Dunyo bo‘ylab 80 kun”
Klassikani oshuftasi bo‘lgan, ammo farzandlari Jyul Vernni faqat mushuklar haqida yozgan ekan degan xayolga borishini istamaganlarga 1972-yilda suratga olingan hamda Fileas Fogg haqida hikoya qiladigan multfilmi tomosha qilish tavsiya qilinadi. 16 qismdan iborat multfilmdagi qahramonning sarguzashtlari siz va bolalaringizni zeriktirmasligi aniq.
“Moana”
2016-yilda taqdim qilingan va Gavayi orollarida yashaydigan mard va jasur Moana ismli qizning sarguzashtlari esa hech kimni befarq qoldirmaydi, tomoshabinni ekran qarshisiga mixlab qo‘yadi.
“Yuqoriga”
2009-yilda ekran yuzini ko‘rgan multfilmni tomosha qilgan katta-yu kichik sayohatga otlanish uchun hech qachon kech emasligini tushunib yetadi.
“Eldorado sari yo‘l”
2000-yilda taqdim qilingan multfilm qahramonining qo‘liga shahar chakalakzorlaridagi yo‘qolgan xazinaning xaritasi tushib qoladi. Voqealar rivoji davomida xazinani qidirishga otlangan qahramonning sarguzashtlarini ko‘rish mumkin bo‘ladi.
“Atlantida: yo‘qotilgan imperiya”
Insoniyat bilan bog‘liq sirlarni yaxshi ko‘radigan va bolalarini ham qiziqtirishni istaydiganlarga 2001-yil taqdim qilingan multfilmni tomosha qilish tavsiya qilinadi.
Mavzuga doir:
- Disney kompaniyasi 7 yoshga kirmaganlarga “irqchilik”ka oid sahnalar mavjudligi sababli ba’zi multfilmlarni ko‘rishni cheklab qo‘ydi
- “Cheburashka. Bayram siri” 3D-multfilmining ilk tizeri namoyish etildi
- “Krudslar oilasi 2” multfilmi bir hafta ichida yana 3 mln dollar to‘plab, Amerika prokatida birinchi o‘rinni egalladi
Izoh (0)