Gollivud yulduzi Mett Deymon Kann kinofestivali davomida jurnalistlar bilan bo‘lib o‘tgan suhbat jarayonida Jeyms Kemeronning “Avatar” nomli “kichikroq filmi”da bosh rolni o‘ynash taklifini qanday rad etganini so‘zlab berdi, deb yozadi Esquire.
Kemeron Deymonga kassa yig‘imlarining 10 foizini taklif qilgan, biroq aktyor o‘sha vaqtda “Jeyson Born” filmida suratga tushayotgani sabab rejissorga rad javobini bergan.
Vaqt o‘tgach, aktyor jahon kinematografiya tarixidagi eng yirik shartnomadan voz kechgani ma’lum bo‘ldi, chunki “Avatar” prokatda 2,7 milliard dollardan ortiq mablag‘ to‘plagan.
“Men tarixga kiraman. Siz hech qachon bu kabi katta pulni rad etgan aktyorni uchratmaysiz”, — deydi Deymon. Uning so‘zlariga ko‘ra, u Born haqidagi franshizani tark etmaslik bo‘yicha ‘axloqiy qaror’ qabul qilgan. Mettning qo‘shimcha qilishicha, bu haqida u birinchi bor do‘sti, aktyor Jon Krasinskiga aytgan. Deymonning ta’kidlashicha, uning hamkasbi va do‘sti bundan shokka tushgan, hatto stoldan turib ketgan.
“Albatta, ‘Avatar’da o‘ynaganingda ham hayotingda hech narsa o‘zgarmagan bo‘lardi. Faqat hozir ikkimiz kosmosda gaplashib o‘tirgan bo‘lardik”, — deya hazillashgan Krasinski.
Natijada Kemeron bosh rolga aktyor Sem Uoringtonni tanlagan. Deadline nashrining yozishicha, u qadar mashhur bo‘lmagan aktyorga kassa yig‘imlarining o‘ndan bir qismi taklif etilmagan bo‘lsa kerak.
Ayni vaqtda Jeyms Kemeron “Avatar” tarixining davomiga aylanishi kerak bo‘lgan to‘rtta yangi film ustida ish olib bormoqda. “Avatar 2”ning premyerasi 2022-yilning dekabriga rejalashtirilgan. Unda Sigurni Uiver, Sem Uorington, Zoi Saldana, Keyt Uinslet va Joel Devid Mur rol ijro etadi.
“Avatar 3” 2024-yilning dekabrida ekran yuzini ko‘rsa, “Avatar 4” — 2026-yilning dekabrida, “Avatar 5” esa 2028-yilning dekabrida taqdim etiladi.
Izoh (0)