Qashqadaryo viloyatining Qarshi tumanida ishchilarining 81 million so‘mlik maoshini “yeb ketgani” aytilgan bog‘cha mudirasi olti oydan beri mehnat ta’tili, sog‘lig‘ini tiklash ta’tilidan qaytmayotgani sabab u bilan tuzilgan mehnat shartnomasi bekor qilinmayapti. Bu haqda Qarshi shahridagi Jurnalistlar uyida viloyat Maktabgacha ta’lim boshqarmasi mas’ullari bilan bo‘lib o‘tgan matbuot anjumanida ma’lum qilindi, deya xabar berdi “Daryo” muxbiri.
Qayd etilishicha, Qarshi tumanidagi 20-sonli maktabgacha ta’lim tashkiloti rahbari Gulnoza Qodirova bog‘chada faoliyat yurituvchi xodimlarining oylik maoshini o‘zlashtirib yuborgan.
“Qarshi tumanidagi 20-sonli bog‘cha mudirasi Gulnoza Qodirova 2020-yildagi pandemiya paytida davlat oylik to‘lolmay qoldi deb, barcha ishchilarining plastik kartochkasini olib qo‘ygan va ularga 100 ming so‘mdan naqd pul berib, qolgan pulni o‘z manfaati yo‘lida sarflagan. Pandemiya paytida davlat ishlamasak ham oyma-oy maosh berib turdi-ku, to‘g‘ri, mufokot olmagandirmiz, ammo oylik maoshimizni o‘z vaqtida olib keldik. Biroq Qarshi tumanidagi bog‘cha rahbari pandemiyani bahona qilib, ‘davlat oylik berolmayapti’, deb ishchilarining 81 million so‘mlik maoshini o‘zlashtirib yuborgan”, — deydi viloyat Maktabgacha ta’lim boshqarmasi boshlig‘i Asror Alimardonov.
Asror Alimardonovning ma’lumot berishicha, bog‘cha mudirasining mazkur qilmishi tuman prokuraturasi e’tiboriga ham tushgan.
“Bog‘cha mudirasining mazkur qilmishi haqida tuman prokuraturasiga ham ma’lumot berilgan. Prokuratura mazkur ish bo‘yicha jinoyat ishi ham qo‘zg‘atgan”, — deydi boshqarma boshlig‘i.
Matbuot anjumanida qayd etilishicha, Qarshi tumanidagi 20-sonli maktabgacha ta’lim tashkiloti rahbari bolalar haqiga ham xiyonat qilib kelgan.
“Bir kuni shu bog‘chaga dabdurustdan borib, 100 nafar bolaga 3 kilo go‘sht berilganiga guvoh bo‘ldim. Shu kuni dalolatnoma tuzib, bog‘cha rahbariyatini qattiq ogohlantirdim. Ertasi kuni yana boshqarma xodimlarini yuborib, tekshirtirdim. Yana kam go‘sht berilganiga guvoh bo‘lishgan. Shu kuni sog‘lig‘imda muammo bor deb, davolanish ta’tiliga chiqib ketgan bog‘cha mudirasi hamon ishga qaytgani yo‘q. Biz tuman tibbiyot birlashmalari rahbarlariga bog‘cha mudiralariga sog‘lig‘ini tiklash ta’tiliga chiqish uchun dabdurustdan hujjat bermasliklarini iltimos qilamiz. Biroq befoyda. Mana olti oy muddat o‘tdiki, bog‘cha rahbari ishga qaytmadi. Tanishlari ‘nega ishga chiqmayapsan?’ deb so‘rashsa, ‘yaqinda Alimardonov ishdan ketadi, ketsa chiqaman’, derkan. Ko‘ryapsizmi, qay darajaga yetib borishyapti?”, — deydi boshqarma mas’uli.
Boshqarma boshlig‘i jurnalist va blogerlar bilan bo‘lgan muloqotda boshqarmada bir kun rahbarlik qilsa ham, bolalar haqiga xiyonat qiluvchi rahbarlarga qarshi kurashishini ma’lum qildi.
Izoh (0)