Қашқадарё вилоятининг Қарши туманида ишчиларининг 81 миллион сўмлик маошини «еб кетгани» айтилган боғча мудираси олти ойдан бери меҳнат таътили, соғлиғини тиклаш таътилидан қайтмаётгани сабаб у билан тузилган меҳнат шартномаси бекор қилинмаяпти. Бу ҳақда Қарши шаҳридаги Журналистлар уйида вилоят Мактабгача таълим бошқармаси масъуллари билан бўлиб ўтган матбуот анжуманида маълум қилинди, дея хабар берди «Дарё» мухбири.
Қайд этилишича, Қарши туманидаги 20-сонли мактабгача таълим ташкилоти раҳбари Гулноза Қодирова боғчада фаолият юритувчи ходимларининг ойлик маошини ўзлаштириб юборган.
«Қарши туманидаги 20-сонли боғча мудираси Гулноза Қодирова 2020 йилдаги пандемия пайтида давлат ойлик тўлолмай қолди деб, барча ишчиларининг пластик карточкасини олиб қўйган ва уларга 100 минг сўмдан нақд пул бериб, қолган пулни ўз манфаати йўлида сарфлаган. Пандемия пайтида давлат ишламасак ҳам ойма-ой маош бериб турди-ку, тўғри, муфокот олмагандирмиз, аммо ойлик маошимизни ўз вақтида олиб келдик. Бироқ Қарши туманидаги боғча раҳбари пандемияни баҳона қилиб, ‘давлат ойлик беролмаяпти’, деб ишчиларининг 81 миллион сўмлик маошини ўзлаштириб юборган», — дейди вилоят Мактабгача таълим бошқармаси бошлиғи Асрор Алимардонов.
Асрор Алимардоновнинг маълумот беришича, боғча мудирасининг мазкур қилмиши туман прокуратураси эътиборига ҳам тушган.
«Боғча мудирасининг мазкур қилмиши ҳақида туман прокуратурасига ҳам маълумот берилган. Прокуратура мазкур иш бўйича жиноят иши ҳам қўзғатган», — дейди бошқарма бошлиғи.
Матбуот анжуманида қайд этилишича, Қарши туманидаги 20-сонли мактабгача таълим ташкилоти раҳбари болалар ҳақига ҳам хиёнат қилиб келган.
«Бир куни шу боғчага дабдурустдан бориб, 100 нафар болага 3 кило гўшт берилганига гувоҳ бўлдим. Шу куни далолатнома тузиб, боғча раҳбариятини қаттиқ огоҳлантирдим. Эртаси куни яна бошқарма ходимларини юбориб, текширтирдим. Яна кам гўшт берилганига гувоҳ бўлишган. Шу куни соғлиғимда муаммо бор деб, даволаниш таътилига чиқиб кетган боғча мудираси ҳамон ишга қайтгани йўқ. Биз туман тиббиёт бирлашмалари раҳбарларига боғча мудираларига соғлиғини тиклаш таътилига чиқиш учун дабдурустдан ҳужжат бермасликларини илтимос қиламиз. Бироқ бефойда. Мана олти ой муддат ўтдики, боғча раҳбари ишга қайтмади. Танишлари ‘нега ишга чиқмаяпсан?’ деб сўрашса, ‘яқинда Алимардонов ишдан кетади, кетса чиқаман’, деркан. Кўряпсизми, қай даражага етиб боришяпти?», — дейди бошқарма масъули.
Бошқарма бошлиғи журналист ва блогерлар билан бўлган мулоқотда бошқармада бир кун раҳбарлик қилса ҳам, болалар ҳақига хиёнат қилувчи раҳбарларга қарши курашишини маълум қилди.
Изоҳ (0)