Qashqadaryoda viloyat Maktabgacha ta’lim boshqarmasi boshlig‘i Asror Alimardonovga 6 ming dollar pora berib ishga kirganini aytgan bog‘cha mudirasi jinoiy javobgarlikka tortilishi mumkin. Bu haqda Qarshi shahridagi Jurnalistlar uyida bo‘lib o‘tgan matbuot anjumanida ma’lum qilindi, deya xabar berdi “Daryo” muxbiri.
Ta’kidlanishicha, viloyat Maktabgacha ta’lim boshqarmasi boshlig‘i Asror Alimardonov viloyatda faoliyat yurituvchi jurnalist va blogerlar bilan muloqotda tizimda bo‘layotgan adolatsizliklarni ochishda bosimga uchrayotganini, ba’zan tuhmatga duch kelayotganini ma’lum qilgan.
Boshqarma boshlig‘ining qayd etishicha, 2020-yil yanvar oyida Chiroqchi tumanida Janubiy Koreya uslubi asosida 7 milliard so‘mga qurilgan yangi bog‘cha foydalanishga topshirilgach, boshqarma boshlig‘i sifatida mudira tayinlab, jamoani ham o‘zi shakllantirib bergan.
“Ammo mudira boshqarma mutaxassislari tomonidan shakllantirilgan jamoani ishga olmay, o‘zining tanish-bilishlarini, xususan, qarindoshlarini ishga olgani uchun shikoyat tushdi. Bunga javoban holatni vazirlik mutaxassislari o‘rgandi. Dastlabki o‘rganishdan so‘ng mudira ogohlantirildi. Holat yana takrorlangach, vaziyatni qayta o‘rgandik va mudiraga u bilan tuzilgan shartnomani bekor qilishimizni aytdik. Shunda mudiraning opasimi yoki singlisimidi yonimga kelib, ‘Biz sizni ishga olish uchun pul olgan’, deya ayblaymiz deyishdi. ‘Asosingiz bo‘lsa, isbotlab berolsangiz ayting’, dedim. Xullas, biroz o‘tib, internetda bog‘cha mudirasi menga 6 ming dollar berib ishga kirganini aytib chiqdi. Bir kun o‘tgach esa mudira bu gapni jahl ustida aytganini bildirib, uzr ham so‘rab chiqdi”, — deydi boshqarma boshlig‘i Asror Alimardonov.
Boshqarma boshlig‘ining qo‘shimcha qilishicha, unga pora berib ishga kirganini aytgan bog‘cha mudirasi bo‘shatilishi haqidagi voqeadan so‘ng tanish-bilishlarini olib, boshqarma boshlig‘ining yashash uyiga ham borgan va unga do‘q-po‘pisa qilgan.
“Buning uchun 18-bog‘cha mudirasi ma’muriy javobgarlikka ham tortildi. Pul berib ishga kirganman degan gapi uchun endi jinoiy javobgarlikka ham tortilishi mumkin. Ayni paytda bu ish bo‘yicha tergov jarayonlari yakunlanib, ish sudga chiqdi. Endilikda mudiraning avvaliga pul berdim deb, meni obro‘sizlantirib, keyin bu gaplarni jahl ustida aytgandim, degan gaplariga sud huquqiy baho beradi”, — dedi boshqarma boshlig‘i.
Matbuot anjumanida aytilishicha, viloyatda maktabgacha ta’lim tizimidagi jirkanch illatlarni bartaraf etish maqsadida boshqarma tomonidan ko‘plab ishlar amalga oshirilmoqda.
“Shu yilning o‘zida boshqarma boshlig‘i tashabbusi va sa’y-harakati bilan bolalar haqiga xiyonat qilayotgan 16 nafar mudira ishdan olindi. Noqonuniy holatlarga qarshi murosasiz kurashilmoqda. Ayrim hollarda, jumladan, Chiroqchidagi holatlarda o‘z lavozimi, mansabi uchun ig‘vo tarqatish, tuhmat qilish holatlari ham uchrab turibdi. Bu kabi tuhmat va asoslanmagan ma’lumotlar boshqarma mas’ullarining obro‘siga ta’sir ko‘rsatishi mumkin”, — deydi boshqarma axborot xizmati rahbari Bahodir Musayev.
Matbuot anjumanida ta’kidlanishicha, ayni kunda viloyatda 1954 ta maktabgacha ta’lim tashkiloti bo‘lib, viloyatda maktabgacha yoshdagi bolalarning muassasalarga qamrab olinishi 48 foizga yetgan.
Izoh (0)